Идалыкым кузе вашлият, тугак илаш тӱҥалат

У Пураял клубышто У ий вашеш бал-маскарадым эртарышна. Калык пеш шуко погыныш. Амалже - У ийым эн кугу пайремлан шотлат, садлан ик ий мучко клубыш лекдымыжат мия.

Эше лотерей билетым ужалышна, тӱҥ призлан смартфоным ямдыленна ыле. 200 наре билетым ик арня коклаште налын пытарышт. Бал-маскарадыште эн ондак йомакым ончыктышна, Пий ден Агытан (рольым Венера Кузьмина, Ильнара Шайгатарова модыч) унала тольыч, Йӱштӧ Кочай ден Лумӱдыр пӧлекым кондышт (Герман Калитов, Виолетта Айбердина).

Кок вӱдышӧ (Валентина Афкаликова, Виктория Умутбаева) шуко мыскарам ыштышт, а эше Валентина мотор мурыжым пӧлеклыш. Пайрем калык кож йыр мурыш, почеламут-влакым ойлыш, юарлен модо.

Икманаш, пагыт пеш веселан эртыш. Вара лотерей билет модмашым эртарышна. Кӧлан мешак ложаш, кӧлан шампанский лектыныт, агытан да шуко моло пӧлек ыльыч. А смартфон Данил Исинеевлан логале, тудыжо кокымшо классыште веле тунемеш, ачаж дене миен. Бал-маскараднам пайрем дискотека дене мучашлышна.

У ий касым эртараш «Локама» ансамбль пеш чот полшыш, нунылан пеш кугу таум каласыме шуэш. Эре тыгай чулым, таза да ешыштышт пиалан лийышт.

7 январьыште Марий касым эртарен колтышна. Тошто куштымаш-влакым шарналтен («Латкокыт», «Пар кычалын», «Йоген кайымаш» да молымат), ӱдыр-рвезе-влак дене пырля кушташ тунемна, модыш-влакымат модна, вара «кандырам пунышна». Тыште адакат «Локама» ансамбльын полшымыж дене веселитлышна.

11 январьыште Шорыкйолым пайремлышна. Васлий Кугыза да Куваже лийын чийышна, имньым моторландарышна, вара сурт сайын кайышна. Эн ондак Керемет ял гыч тӱҥална. Сапаевмыт деке пурышна, мурышна-куштышна, шорык паран йол дене мужедна, портышкемым кышкен модна, кочна-йӱна, идалык мучко мом ыштылмыштым йодыштна. А сийышт пеш тутло ыле! Тау суртоза ден ватыжлан! Мемнан дене пырля Шорыкйолым пайремлаш шуко еҥ погыныш.

Икманаш, чылажымат шуктен ыштен шогет гын, марий йӱланат, койыш-шоктышнат, калыкнат таза-эсен лийыт да илаш тӱҥалыт. Чылажат шкенан деч шога.

Л. ШАМШУКОВА, Пураял клуб вуйлатыше.