Сай пашан саcкаже эрелан кодеш

Палемдыме кечын культура пӧрт деке сава кучен, мотор чиен погынышна. Раиса Аптиева, Лидия Костина, Вера Шакирьянова, Юрий Митрофанов, Глуховмыт, Лидия Федорова, Татьяна Афанасьева, Галина Уварова, моло туныктышо, тӱвыра пашаеҥ, сулен налме канышыште улшо-шамыч тошто марий йӱлам шарналташ уло кумылын келшышт.

Кугурак-влак шудо солымаште самырык-влакым савам тӧрлаш, шумаш туныктышт. Ожно колхозлан шудым ямдылымыштым, эн устан солышо-влакым ушештарышт. Меат солымаште талырак-влакым палемдышна. Ӱдырамаш-влак коклаште Раиса Аптиева, пӧръеҥ-влак гыч Юрий Митрофанов ойыртемалтыч. Нуно шудым йыр пӧрдын солышт, почешышт кугу мотор пакосым ыштен кодышт. Самырык ӱдырамаш-влакат - Христина Шакирьянова, Лидия Федорова, Лиана Глухова, «Меат вараш огына код» манын, вийым пыштенак тыршышт.

Марий тувыран ӱдырамаш-влак шудо олыкым пеледыш гай сӧрастарышт. Вет ӱдырамаш шкежат - пӱртӱсын поянлыкше. Пеледыш гай эре мотор лиеш гын, тудым ойго кораҥ кая. Пайрем ӱстелна кеҥежын сийжылан поян лие - у пареҥге, шке пакчаште куштымо кияр, мӧр варене, тӱрлӧ-тӱрлӧ шудо гыч шолтымо чай...

Тиде кече мемнан чонышто поро кумылым шочыктыш, чыланнамат эше чакрак лишемден кодыш. Арамлан огыл дыр калыкыште «Шудо кошка, пеледышыже йога, сай пашан саскаже эрелан кодеш» маныт.

Л. АЛЫНБЕКОВА, Йывангасола культура пӧрт вуйлатыше.