«Салика» спектакльым ончышна

Нефтекамск оласе кугыжаныш филармонийын сценыштыже артист-влак марий драматург Сергей Николаевын пьесыж почеш шындыме «Салика» пьесым модын ончыктышт. Спектакль моткоч келге да сай шарнымашым кодыш. Сценыште театрын тичмаш усталык коллективше - эн мастар да виян актер-влак - усталыкыштым ончыктышт. Тиде Россий Федерацийын сулло, Марий Эл Республикын калык артистше-влак Олег Кузьминых, Маргарита Медикова, Марий Элын калык артисткыже-влак Светлана Строганова, Антонина Антонова, Марий Элын сулло артисткыже-влак Людмила Казанцева, Марина Почтенева, МАССР-ын сулло артистше Юрий Алексеев да молат. Кажныже рольжым моткоч устан чоҥыш. Тӱҥ герой-влакым - Салика ден Эчукым - Марий Элын сулло артисткыже Алина Егошина ден театрын актержо Игорь Антропов устан модыч. Поян Ози Кузи кугызам Россий Федерацийын сулло, Марий Эл Республикын калык артистше Иван Смирнов, Саликам виеш туларташ толшо Полат Акпайым Россий Федерацийын сулло, Марий Эл Республикын калык артистше, режиссер, киноактер Василий Домрачев, Маринам актриса Е. Александрова келыштарышт. Спектакль мучко, тӱҥалтыш гыч мучаш марте, сцена гыч Эчукын Чопай йолташыже ыш кораҥ.

Садлан тудымат ик тӱҥ рольлан шотлаш лиеш, очыни. Тиде геройым мемнан землякна - Калтаса район Тошто Яш ялын шочшыжо, Москвасе М. Щепкин лӱмеш Кӱшыл театральный училищын выпускникше Г. Тимиряев - мастарын келыштарыш.

Спектакльыште модшо вес землякнамат - Мишкан район Тӧлдӧ ялын эргыже, Марий Эл Республикын сулло артистше Артем Асмаевым - ужаш моткоч кумылло ыле. Спектакль деч ончыч калыкым саламлыме годым М. Шкетан лӱмеш театрын вуйлатышыже Э.А. Юзыкайн (Тукымвожшо Краснокам район Чормак ял гыч тӱҥалеш.) ден театрын тӱҥ режиссержо, Марий Эл Республикын калык артистше Р.Ю. Алексеев сценыште оласе марий мер тӱвыра рӱдерым вуйлатыше И. Губаевлан театрлан 100 ий темме лӱмеш ямдылыме шарнымаш пӧлекым кучыктышт. «Салика» спектакльым «Марий кундем» калык семӱзгар оркестр сӧрастарыш. Залысе калык тидымат ойыртем семын вашлие. Шочмо йылме дене йоҥгышо ныжыл марий сем залыште шинчыше кажне зрительын шӱм-чонжым тарватыш. А залыш калык ятырак погынен ыле (Оласе калык марий спектакльыш шукертак туге рӱж чумырген огыл ыле.). Спектакль деч вара театрын уста коллектившым залысе калык вер гыч шогал совым кырен тауштыш.

Шкетан театрын актержо-влак (шола гыч):
И. Антропов, А. Егошина,
Е. Александрова, Г. Тимиряев.
Л. Тимиряеван фотожо-влак.

Театр, воштончыш семын, айдемын илышыж дене кылдалтше куанжым, ойгыжым, пиалжым, саманын тӱсшым кумдан да раш почын ончыкта. Спектакль эре могай-гынат шонымашым тарвата, илышым умылаш полша. «Салика» спектакль марий калыкын ожсо илышыже, паша, сӱан йӱлаже, койыш-шоктышыжо, мурымаш-куштымашыже, да конешне, шӱм-чон поянлыкше гоч калыкнан шкешотан улмыжым, ойыртемжым шижаш сай йӧным ыштыш.

Актер Г. Тимиряев родо-шочшыдо-влак дене пырля.

Э.А. ЮЗЫКАЙН, М. Шкетан лӱмеш марий национальный драме театрын директоржо: «Гастрольна Нефтекамск олаште тӱҥале. Мый тиде вашлиймашым моткоч кӱкшын аклем. Мыйын шонымаште, верысе публика тыгай кугу спектакльым шукертак ужын огыл. Калык моткоч шуко погынен, садлан мый изишак ӧрынамат тыге шокшын вашлиймылан. Руш манмыла, «приятный сюрприз» ыле. Пытартыш жапыште шукыжым куштылго концерт, шулдакан артист-влак коштыт гастроль дене, постановкыштат келге огыл. Тиде гастрольлан федерал тӱвыра министерство мыланна оксам ойырен, садлан, Театр идалык дене кылдалтше программылан эҥертен, Пошкырт кундемыш эн чапле спектакль-влакым кондаш тыршышна. Молан «Салика»? «Салика» - ик могырым, тиде классика, вес могырым, - эн йӧратыме комедий. Публикым ӧрыктараш, куандараш постановкышто «Марий кундем» оркестрым кучылтынна. Зритель моткоч сайын вашлие - залыште воштыльыч, шортыч... Мый, Пошкырт марий вожан айдеме семын, йӧн лиймеке, тывел кундемыш эн сайжым, эн моторжым - эн сай спектакльым - кондаш тыршенам».