Театр тӱняш омсам почна

Тиде сомыл деч Рушарня марий школын педагогшо-влакат ӧрдыжеш кодын огытыл - «Шочмо йылме - калыкын поянлыкше» изирак театрализованный представлений семын «Рывыж ден тумна» йомакым ямдылышна. Ава-ача-влакат тореш ышт лий. Йомакнам тӱрлӧ мурымаш-куштымаш дене сӧрастарышна, изирак декорацийым ямдылышна. Тунемшына-влак йомакым пеш сайын модын ончыктышт. Рывыжын рольжым Гита Мадиярова, тумнам Камилла Сакратова, тумна иге-влакым Аделина Микишева, Данил Ганеев, Марк Ильбарисов, шогертеным Светлояр Мадияров, куштымашым Вирс Ильбарисов ден Лилия Сагитова келыштарышт.

Йомакыште модшо йоча, нунын ава-ачаштлан кугу таум каласена. Марий йылме дене театр сынан йомак-влакым умбакыжат шуяш да кугырак сценыште ончыкташ шонена.