Кугу ялыште изи клуб. Тыште «марий театр» ила

Но тудым клуб манашат ок лий. Пу гыч ыштыме тыглай пӧрт. Ончыч тыште ялсовет верланен улмаш, садлан посна сценыже уке. Чылажат ик пӧлемыште эрта, артист ден ончаш толшо-влакым чарша веле ойыраш тӧча. Туге гынат Памаш ялысе калык тышке чӱчкыдын погына, концертым веле огыл, эсогыл спектакльымат ончат. Клуб пашаеҥ-влак ялысе тӱвыра илышыште кугу сомылым шуктен шогат.

17 апрельыште клуб пеленсе самодеятельный коллектив М. Шкетанын «Кок сӱанат пеле…» комедийжым модын ончыктыш. Бирск районысо тӱвыра учреждений-влак коклаште кок ийлан ик гана оҥай конкурсым эртарат - ялласе художественный самодеятельность коллектив-влакын спектакльым шынден моштымыштым тергат. Тений тыгай сомылышт Театр идалыклан моткоч келшен толеш.

М. Шкетанын пьесыже почеш спектакльым клуб вуйлатыше М. Янышева шынден. Конешне, ямдылалтме годым художественный вуйлатыше Л.Сайсановат нигунам ӧрдыжеш ок код.

Спектакльын содержанийже пеш оҥай. Самырык, кокла да кугу ийготан кум мужыр ЗАГС-ыш толын. Кӧ ойырлынеже, ала-кудыжо ушнынеже… Икманаш, ЗАГС пашаеҥым аҥыртарен, сыратен пытарат. Мучашлан тугак шаланат: огытат ойырло - сӧрасат, огытат ушно - икте-весыштым йоҥылыш верештмылан шотлат…

Бирск ола гыч толшо аклыше комиссийын еҥже-влак спектакльым лончылымо годым роль-влакым устан чоҥымым палемдышт.

Анжелика Иликбаева, Марина Янышева, Андрей Ярмингин, Михаил Ижбулдин, Любовь Аптреева кугурак да шоҥгыеҥ-влакын койышыштым, тунемше-влак Тимур Исанов, Полина Сайсанова самырык мужырын возалташ толмыжым келыштарен модыч. Ончышо-влак спектакль мучко улнен воштыльыч.

Калыкым чумырен моштышо клуб пашаеҥ-влакын вес суапле сомылыштымат палемдаш кӱлеш. Клубыш почта пашаеҥ Ольга Янситоват миен ыле, еҥ-влак спектакль деч вара «Чолман» газетлан возалтыч, пиаланракше-влак пӧлекымат модын нальыч.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».