Татар тӱвыра кече-влак тӱҥальыч

«Нур» верысе йоча музык театрын йоҥгалтарыме муро-влак, татар поэт-влак Г. Тукайын «Театр» почеламутшо, Х. Такташын «Сулыкдымо пырыс» постановкыжо Театр идалыкын ойыртемжылан лач келшен тольыч. «Ак калфак» фольклор ансамбльын кастене «кудышто» кидпашам кучен, калык мурым шуйдарен, погынен шинчымашым ушештарыше сценкыже ялысе ончычсо илышыш пӧртылтыш. Мо оҥайже, икте-весе дене Интернет гоч огыл, а тыге вашлийын,

мутланен, жапым пайдалын эртарымым ужын, залыште шинчыше йоча-влакын шинчаштышт ӧрмалгыме кумыл палдырныш. Веселан, пырля чумырген мутым вашталтымаш, кочывӱд деч посна каналтымаш нунылан, тачысе илыш дене таҥастарымаште, ойыртемалтшын чучо, очыни. Кушкын толшо тукым тидым, тачысе илышын сай ден уда койыш-шоктышын ойыртемжым умылаш, шочмо йылмын сылнылыкшым шижаш да колаш тунем шуэш мо? Кертеш. Ешыште, суртышто шочмо йылме дене кутырена гын.