Марий театр Башкортостаныш толеш

2019-ше ийым элыштына Театр идалык семын увертареныт. А Марий Элысе М.Шкетан лӱмеш Марий калыкле драме театр тений 100 ияш лӱмгечыжым палемдаш ямдылалтеш. Тидын лӱмеш Марий Эл Республикысе районлаште Театр кече-влакым эртарат да, можо поснак чот куандара, апрель тӱҥалтыште мемнан кундемышкат толын шуаш сӧрат.

Татар драматургын пьесыже почеш шындыме комедийыште действий тыглай ешыште эрта. Каныме пӧрт гыч пӧртылшӧ марий ватыж дене вурседалмашке шуэш, вара пачерже гычат лектын кая. Ӱдырамаш сырымыж дене ала-кунам кафеште палыме лийме пӧръеҥлан йыҥгырта да унала ӱжеш. Но вучыдымын пелашыже угыч пӧртылеш, а почешыже - каныме пӧртыштӧ вашлийме ӱдыр…

Тыгай савыртыш кушко шуктен кертмым спектакль мучаште пален налын кертыда.