+14 °С
Облачно
Тазалык - поянлык
1 Мая , 07:00
Туныктышо-влак санаторийыште каналтеныт
Тазалык - эн кугу поянлык. Образований да наука пашаеҥ-влакын республикысе профсоюзышт шинчымаш аланыште тыршыше-влаклан кугу тӱткышым ойыра. Пашаеҥже-влак профсоюзын еҥже улыт гын, нунылан санаторийлаште тазалыкым пеҥгыдемдыме йодышлан тӱрлӧ йӧным кычалеш да илышыш шыҥдараш тырша. Санаторийыште каныше-влак путевкын пел акшым веле тӱлат, моло роскотшым республикысе профсоюз комитет шке ӱмбакыже налеш.
«Зелёная роща» санаторийыште. Авторын колтымо фото.
Тений шошо каникул жапыште Шаран районысо туныктышо-влаклан Уфа оласе «Зелёная роща» санаторийыште канаш пиал шыргыжалын. Тушко Акпарс школ гычат кум пашаеҥ миен - тиде историйым туныктышо А.А. Асмаева, математикым туныктышо Л.М. Бахтиярова да тӱҥалтыш класслаште туныктышо З.Б. Ильгузина. Нуно санаторий гыч чылан куаныше пӧртылыныт, канымышт нерген пеш оҥайын каласкалышт.
«Туныктышо-влаклан республикысе санаторийлаште каналташ йӧным ыштымылан кугу тау! Сероводородан, углекислый, кукшо ванна-влак, эмлыше массаж, бассейн, шинчалан шахта, физкабинет, фитотерапий - чыла тидым путевкышкак пуртымо ыле. Кажне кастене тӱрлӧ мероприятийым: палыме артист-влакын концертыштым, тематика шотан викториным, вашлиймашым да дискотекым - эртареныт. Чыла шотыштат йӧнан «люкс» пӧлемлаште иленна, кочкыш шотыштат нимогай ситыдымаш уке ыле. Икманаш, сайын каненна», - куанен каласкала Ангелика Александровна.
«Санаторийыште жапым пеш веселан да пайдалын эртарышна. Тӱрлӧ процедур-влак деч вара экскурсийлаш коштынна. Каныме паркыш, лимонарийыш, тоштерыш, моло вереат миенна. Чыланат куан дене темше, пиалан пӧртылынна», - ойла Леана Марксовна.
«Санаторийын шкенжын «Хызыр» минеральный вӱдшӧ - ойыртемалтше пӱртӱс источникше - уло. Жапым муын, шукырак туныктышо тазалыкшым пеҥгыдемден да санаторийыште канен кертше манын тыланем. Туныктышо профессийын престижшым нӧлталаш - тиде сай стимул. Мемнан пашадарна пеш кугуак огыл, садлан профсоюз деч витле процент кугытан полышым сайлан шотлем», - каласыш Зинаида Бикъяновна.
