Умша кӧргым арун кучыза

Умшасе тазылачоран (слизистая оболочка) рак черже - тиде йылмын, умша кӧргын, шӱргын злокачественный новообразованийже-влак.                                      

Осалын пуалше чер (злокачественная опухоль) таза организмыште ок илане. Умша кӧргыштӧ рак черлан вияҥашыже удан йӧнештарыме пӱй протезлан кӧра коваште пуаҥмаш, кариес пӱйын вожшо эмганымылан кӧра вияҥше хронический чер-влак амалым ыштат. Раклан тыгак тамакым шупшмаш, тӱрлӧ инфекций ден токсин, пагарым локтылшо вещества-влак (кочывӱд, кислота, тамым пуышо пӱсӧ йӧр, шокшо кочкыш да молат), умша кӧргысӧ бактериальный инфекций «полшат», икманаш тидлан амалым пуышо 80 процентше - тиде тамак ден кочывӱд. 

Умша кӧргыштӧ рак чер ылыжмым мо палдара? Тидым врач гына рашемден кертеш. Тыгай годым стоматолог онколог декат колта. Тиддеч лӱдмӧ ок кӱл. Тушто тогдайыме чер нерген шонымашым пеҥгыдемдат гын, писынрак эмлалташ тӱҥалаш лиеш. 

Умшасе тазылачора дене кылдалтше чер-влак деч аралалташ манын,  тыгай темлымаш-влакым шотыш налаш уто огыл:

1) умша кӧргылан санацийым ыштыман: пӱйысӧ отложений-влакым кораҥдыман, йоҥылыш ыштыме пӱй протез ден пломбым вашталтыман, пӱйын локтылалтше вожшым лукман, кариесым да тудлан кӧра лийше моло экшыкым эмлыман;

2) утыждене шокшо кочкышым шагалрак кочман, кочывӱдым шагалемдыман, тамакым шупшмым чарныман;

3) пакчасаскам, фруктым шукырак кочман, чоштыран йоҥыштымо ложаш гыч ямдылыме кочкыш нергенат мондыман огыл; 

4) умшаште когартыме гай чучмым, металлын тамжым шижме годым тӱрлӧ металл гыч ыштыме пӱй протезым алмаштыме нерген шоналтыман;

5) кечывалым, ультрафиолет излученийын вийже кугу годым, уремыште кече йымалне шуэнрак коштман, кече деч аралыше гигиенический помада дене пайдаланыман;

6) умша кӧргын гигиеныжым чот эскерыман;

7) идалыклан кок гана стоматолог деке миен тергалтман.

Черле-влакым сайын эмлымаш эн ондак диагнозым жапыштыже да чын шындыме деч шога. 

Умша кӧргыштӧ, тӱрвӧ лукышто йора, пешкыдемше ком, шелше, эрозий гай изирак вашталтышым ужында гын, стоматолог-врач дек миен, каҥашым налаш кӱлеш. Лач тиде жапыште чер ваштареш кучедалаш да тудым сеҥаш лиеш. Таза лийза!