Психикым аралена

Кече режимым эскерыман. Ик жапыштак малаш вочман да кынелман. Айдемылан суткаште шым-кандаш шагат деч шагал огыл малаш кӱлеш. 

Шуко витаминан кочкышым кочкаш тыршыман. Пакчасаскам да емыжым кече еда 400-500 грамм деч шагал огыл кочман, тыгак шӧр-торык, кол, тӱрлӧ пӱкш-влак пайдале улыт. Коя, жаритлыме кочкыш деч шӧрлыман. Фастфудым да пелефабрикатым кучылтмым шагалемдыман. Арака нерген мондыман - тудо организмлан кугу эҥгекым конда.

Спорт дене кылым кучыман. Арамлан огыл ойлат: «Таза капыште - таза чон». Айдемын шижмашыже, тазалыкше, шкалан ӱшанымыже, шкем кучен моштымыжо кап-кыл дечат шога. Эрдене физический упражнений-влакым ыштыман, нуно стрессым кораҥдаш полшат. Тыге айдеме капшым гына огыл, иканаште психикыжымат пеҥгыдемда.

Айдеме койыш-шоктышыжым терген шогышаш. Кеч-куштат шкенжым моторын кучышаш. Чонлан келшыше пашам ыштыза: куштыза, пидса, мурыза, тӱрлыза, книгам лудса. 

Уда увер-влакым шагалрак колышташ тыршыман. Сайым гына шонаш тунемман.  Илышыште кеч-могай ситуацийым тӱрлӧ семын аклаш лиеш. Икте вес еҥын сеҥымашыжымат уда могыр гыч онча, весе, мӧҥгешла, эн йӧсӧ пагытыште йӧным муэш. Оптимист-влаклан илаш куштылгырак маныт, вет нуно утларак весела да чулым улыт.

Сай огыл, тургыжландарыше, уда омо кончен гын, тиде стресс организмлан удам ыштен кертеш. Тыгай ситуацийыште психолог дек полышым йодын кайыман.