Шкендам аралыза

Грипп - инфекций вирусан чер. Тудо йоча-влакым гына огыл, пеҥгыде кап-кылан пӧръеҥымат йол ӱмбач сӱмыра. Тудын дене утларак шыжым да телым черланат. Чер кенета тӱҥалеш: трук температур кӱза, капым чытырыкта, вий уке, вуй, чогашыл, шинча корштат, логарым «удыркала», кокыртыш лектеш. Вирус организм мучко шарла да тӱрлӧ органын пашажлан эҥгекым конда. Пижедылше чер черле еҥ деч тӱрвычмӧ, кокырымо да мутланыме годым кусна. 

ОРВИ талук мучко вашлиялтеш. Тудо икмыняр тӱрлӧ лиеш. 

Парагрипп эркын тӱҥалеш, йӱк оралга да чарнен кертдыме кокыртыш лектеш. 

Риновирусан инфекций писын тӱҥалеш. Тыгодым нер петыралтеш, умша там иземеш, нер ӱпш йомеш. 

Аденовирусан инфекцийын ойыртемже: чер трук тӱҥалеш. Шинча чер, конъюнктивит, палдырна, ночко кокыртыш лектеш. 

Респираторно-синцитиальный инфекций годым кукшо кокыртыш витара.

Нине инфекций-влак калык коклаште утларак шарлыше улыт. 

Профилактика шотышто шоган, чеснок да имбирь полшат мо? Шоган ден чеснок - калык медицинын йӧнжӧ. Нуным кочкышыш изи порций дене ешараш гын, бактерийым, вирусым сеҥаш полшат. Имбирьын составыштыже иммунный системылан пайдале вещества-влак улыт, садлан тудым утларак грипп дене черланыме годым кучылтыт.

Эпидемий годым еҥ-влак тӱшкан чумыргымо верыште ида кошт. Кевытлаште да транспортышто маскым чийыза, тудым кажне кок шагат сайын вашталтыза. Кечылан кидым икмыняр гана шовын дене мушса. Тӱрвынчыда але кокыреда гын, умшадам нершовыч дене петырыза. Шовычым (салфеткым) кучылтмо деч вара тудым куштыра ведраш шолыза.

Грипп ваштареш эн сай профилактикылан вакцинаций да иммунитетым пеҥгыдемдымаш шотлалтыт. Грипп талышныме жапыште организмлан А, С, Е витамин-влак кӱлыт. Шуко вӱдым, компотым, морсым йӱман.

Йырысе еҥ-влакым черландараш огыл манын, мӧҥгыштӧ кодман, жапыштыже эмлалташ тӱҥалман. Шарныза, врач деч посна ида эмлалт. Тудын толмешке, температурым волтышо эмым гына йӱаш лиеш.