Аптекыш але эмлыме верыш?

Вес кассын ончылныжо пӧръеҥ верге коштымо деч эмым йодеш. «Ожно еҥ-влак, черланен, эмлыме верыш куржыныт гын, кызыт - аптекыш», - шонем семынем. Фармацевт «диагнозымат» шындыш, нунылан эмымат келыштарен пуэн колтыш.

Правительствын пунчалже почеш 1 сентябрь гыч аптекыште эмым рецепт почеш гына ужалаш тӱҥалыт. Аптека пашаеҥ-влак мониторинг системыш рецепт нерген уверым (тудын номержым, кодым, лукмо кечым) пуышаш улыт. 

Тыгай законым кажныже шке семынже ынже эмлалт манын луктыныт. Шуко еҥ, эмлыме верыште черетыште шоген, жапым йомдараш ок йӧрате. Иктаж-мо кошташ тӱҥалеш гын, вигак интернетыште эмым кычалыт але, иктаж-кӧн ой-каҥашыжым колыштын, аптекыш куржыт. Ончыч уныка-влак коваштлан шонымо семын эмым налын кертыныт гын, ынде пенсионер-влаклан рецептым налаш врач деке ошкылаш перна.