Тарванылмаш ӱмырым шуя

Тарванылмаш, физический нагрузка деч посна айдемын чогашылже лушкыдемеш, а жап эртыме семын йӧршын начаремеш. Вийже шагалемеш, нерв системыже пашам удан ышташ тӱҥалеш (вегето-сосудистый дистоний, депрессий вияҥыт), вӱрыштӧ холестерин шукемеш, да атеросклероз вияҥеш. Гиподинамийлан кӧра жап эртыме семын опорно-двигательный аппаратын пашажат шот гыч лектеш: лун нелытше иземеш, остеопороз вияҥеш, йыжыҥ-влак да позвоночник начаремыт - остеоартроз ден остеохондроз чер толын лектыт. Кужун шуйнышо гиподинамий шӱм да вӱргорно (ИБС, артериальный гипертоний), шӱлымӧ орган-влакын черыш шукта, шоло пашам удан ышташ тӱҥалеш. 

Тыге ынже лий манын, мом ыштыман? 

Тӱҥжӧ - тарванылмаш, физический нагрузка да таза илыш йӱлам шуктен илымаш. 

Нуно стресс, депрессий ваштареш кучедалаш полшат, ятыр черым чактарат, кап-кыл нелытым шотышто кучат. Кап-кылым тарватылме годым айдемын физический веле огыл, психический тазалыкшат саемеш, ӱмыржӧ кужемеш.  

Могай каҥашым шотыш налман?

Тидын шотышто БР Здравоохранений министерство темлымаш-влакым ямдылен. 

- Паша марте да паша гыч мӧҥгыш ик-кок остановкым йолын ошкылза;

- Шуко пачашан пӧртыштӧ лифт дене пайдаланыме олмеш тошкалтышым йолын ошкыл кӱзыза;

- Сад-пакчаште шогылтмо годым физнагрузка кечыгутлан икгайрак лийже манын тыршыза;

- Паша верыште вич минутым гимнастикылан ойырыза, йолын коштын савырныза; 

- Кастене, малаш вочмо деч ончыч, изишак яндар южышто коштса;

- Изи йоча-влак дене тарванылме модыш дене модса;

- Шкалан спорт шӱлышан келшыше занятийым (ошкылмаш, куржталмаш, аэробика) ойырыза. Нуным арнялан кум-вич гана эртарыман. Тудо кумло минут наре шуйнышаш.

- Кочмо деч вара занятий марте эн шагалже ик шагат эртышаш;

- Физнагрузка-влакым эркын тӱҥалман, жап эртыме семын нелытым ешарыман;

-  Нуным кеч-могай жапыште - кеч эрдене, я кастене - ышташ лиеш;

- Ончылгоч врач деч каҥашым налаш ок мешае;

- Упражнений-влакым ыштылаш, я ошкылаш йӧнан йолчиемым да вургемым чийыза;

- Физический упражнений-влакым эре иктымак ыштыман огыл, вашталтыман;

- Занятий годым вуй савырнымым, шӱм лишне корштымым, шӱлаш неле лиймым (тын пытымым), лӧчымым шекланыза. Тугай палым шижында гын, организмлан уто нелытым ыштенда, садлан тудым шагалемдыман але йӧршын кораҥдыман.