Оҥай кушкыл

Самырык кушкыл эмлалташ ок йӧрӧ, лышташын ӱлыл ужашыжым гына кучылташ лиеш. Алойлан кум-ныл ий лийшаш. Пӱчмӧ деч ончыч икмыняр кече вӱдым шавыман огыл. Тудым кагазыш вӱдылман да кок арнялан холодильникыш пыштыман.

Нӧчка. Конъюнктивит да нераҥ чер ваштареш кучедалеш, тыгак чот кокырымо годым полша. Нӧчка кап нелытым иземда, иммунитетым пеҥгыдемда.

Сок. Шукыж годым нӧчка гыч сокшым налыт. Тудо шуко эмыште кучылталтеш. 

Ӱп кушмым писемдашлан 1 кугу совла алой сокым, 1 кугу совла кастор ӱйым 1 муноптем дене варыман да ӱпеш йыгыман. 

Лыге деч утлаш 2 кугу совла кушкылым, 1 изи совла кастор ӱйым, 1 кугу совла мӱйым да лимон сокым варыман. Вуй коваштыш йыгыман да пел шагат кучыман.

Ӱп йогымо деч: 1 кугу совла чеснок сокым, 1 кугу совла алойым, 1 муноптемым луген, ӱпыш йыгыман, целлофан пакет дене пӱтырыман. Пел шагат гыч мушкын колтыман.

Ӱпым пеҥгыдемдаш: 1 кугу совла алой сокыш 2 муноптемым да 5 чӱчалтыш А ден Е витаминым ешарыман, вуйыш йыген, пел шагат кучыман.

Куптыр деч маске. Алой витаминлан, аминокислоталан да алланинлан кӧра ийгот вашталтыш дене сайын кучедалеш. Алой сокым ӱй дене варыман да эрат-касат тиде вартышым шинча йыр куптыреш йыгыман.

Саҥгаште куптырлан: 20 г алой сок, 10 г шӱльӧ ложаш, 20 мл вӱд, мӱй да глицерин кӱлыт. Чыла ингредиентым варыман да кӱлеш верыш йыгыман. 20 минут гыч мушкын колтыман. 

Шӱргыначкалан маске: 60 г тыгыдемдыме кияр дене алой сокым 20 мл йогурт дене варыман. 15 минут кучыман да мушкын колтыман.