Тазалыкдам аралыза!

Маскым чийыза

Йырым-йыр черле еҥ шукемме годым транспортышто, кевытыште, еҥ шуко коштмо моло верлаште медицина маскым чийыза, киддам чӱчкыдынрак мушса.

Черланенда - врач дек кайыза

Вий шагалеммым шижыда, кап-кыл температурда нӧлталалтын гын, нигуш коштде, врачым мӧҥгышкыда ӱжыктыза. Шке моштымо семын гына ида эмлалт - тений грипп лӱдыкшӧ, маныт.

Южо еҥ «Врач дек сералтам гынат, кок арня гыч гына логаламыс. Кузе чытыман?» манеш. Шарныза - черле-влак поликлиникыш мийыме кечынак врач дек логал кертыт. Тидлан лӱмын неотложный медицина полыш пӧлем уло. Тендам дежурный врач онча да кӱлеш каҥашым пуа але стационарыш колта.

Неотложный але вашкеполышым ӱжман?

Вашкеполышым илышлан лӱдыкшӧ улмо (травма, вӱр йогымо, шӱмлан приступ, инсульт, шӱлаш йӧсӧ лийме, ушым йомдарыме) годым ӱжыктат.

Неотложный полышым тазалыклан (илышлан огыл) лӱдыкшӧ улмо, мутлан, хронический чер вияҥме, температур нӧлталалт кайыме, давлений тӧрштылмӧ  годым ӱжман. 

Илышыште тӱрлыжат лийын кертеш, тендан дек кӧм колтышашым диспетчер шке пала. Тидлан нунын посна алгоритмышт уло - икмыняр йодыш дене могай полыш кӱлмым рашемден кертыт. Садлан врачым ӱжыктымӧ годым раш вашмутым пуаш тыршыза.

Регистратурыш йыҥгыртен огыда керт гын…

 Врачым ӱжыктымӧ але приемыш возалтме тыгай йӧн-влакымат шарныза:

- Тазалыкым аралыме министерствын контакт-рӱдерже гыч - 122 (ешартыш 2) номер дене. Паша графикше тыгай: паша кечын - 7.30 гыч 19.00 шагат марте, шуматкечын - 8.00 гыч 16.00 шагат марте, рушарнян - 8.00 гыч 14.00 шагат марте. «МТС», «Билайн», «Мегафон» телефон-влак гыч тугок йыҥгырташ лиеш.

- Поликлиникыште инфомат гыч.

- «Госуслуги» гыч.

- Единый doctor.bashkortostan.ru медицинский портал гыч.

- «К врачу» мобильный приложений гыч. Тиде пайдале приложенийым чылалан шындаш темлена. Тушто, мутлан, анализдан результатшымат ужын кертыда. Тушко пураш «Госуслугиште» учетный запись кӱлеш.

Йӱштӧ годым уремыште кузе кылмаш огыл?

Яндар южышто лияш пайдале. «Шокшым кучаш манын, кочкыш-йӱыш дене кап-кыллан энергийым ешараш кӱлеш», - темла нутрицолог, пайдале кочкыш-йӱыш шотышто эксперт Р. Сорокина-Сабирова. Мутлан, уремыш лекме деч ончыч коя колым, муным, ушкал ӱйым йыгыме киндым кочкаш, изи совла мӱйым, лимон пӱчкышым але имбирьым ешарыме леве вӱдым йӱаш лиеш. Но шарныза, «арака ырыкта» манмаш - миф гына, подылшо еҥ кылмымым, тыгак йӱштӧ налмымат шижде кодын кертеш.

Ковышта гай чийыза: ик кӱжгӧ вургем олмеш лучо икмыняр пачаш вичкыж вургемым чияш. Йымалне шокшым кучышо вургем, тӱжвалне капюшонан кужу пуховик лийын кертыт. Шарф олмеш манишкым пыштеда гын, оҥда шокшын коштеш, а вуйчием вуй кугыт лийшаш, пылышым петырыман.

Кылменда гын

Пӧртыш пурымек, вигак мӧҥгысӧ вургемым, меж носким чийыза да мӱян шокшо чайым йӱза. Леве вӱдеш йолымат ырыктен кертыда, но вӱд шокшо лийшаш огыл - температур кенета вашталтмаш шӱмлан лӱдыкшӧ.

Йӱштӧ налмыла чучеш гын, еҥым писынрак коштыкташ, тудлан аракам йӱкташ, массажым ышташ, лум але меж лапчык дене туржаш, компрессым але грелкым пышташ, кылмыктыме верым леве вӱдыштӧ кучаш, ӱй але коя дене йыгаш ок лий. Лучо вашкерак вургемжым кудашман, кукшо шокшо вургемым чиктыман, одеял дене вӱдылман, кап-кылже «кӧргӧ гыч» ырыже манын, леве кочкыш-йӱышым темлыман, вашкеполышым ӱжыктыман.