Рвезе годсым шарналтен мунчалта

Кажне кечын ече дене торашкыракак каенна, курык гыч мунчалтенна, пошкудо ял ваштареш хоккей дене, пушеҥге-влак коклаште шке ыштыме автомат дене икте-весым лӱйкален модынна. Могай весела пагыт ыле! Но эн чотшо курык гыч мунчалташ йӧратена ыле. Кастене ава-ачалан вольыкым ончаш полшет да курыкыш куржат. Кӧ шке ыштыме издер, кӧ вол дене мунчалта. Мунчалтыме деч коч кычкырен волет, йӱк-йӱан ала-куш шумеш йоҥгалтеш. Тудо пагытыште кажне гаяк суртышто шым-кандаш икшыве кушкын. Курык ӱмбалне шем коракла койынна.

- 11 декабрьым Тӱнямбал курык кечылан шотлат. А те иктаж-кузе тиде кечым палемдеда мо?

- Курык кечыжымак огына палемде гынат, кажне ийын У ий деч вара, яра жапым муын, Тӧргым курык гыч але уремыште корнышто мунчалтена. Икмыняр еҥ погынен кайымым ужын, моло-влакат лектыт. Чорай ял велым волымаште корно курыканрак. Телым тушеч мунчалташ эн сай. Ожно шке икшыве лийынна гын, кызыт шочшына, уныкана-влак дене погынен лектына. Мунчалтена, юарлена, изиш нойымек, термос дене намийыме шудо чайым подылына. Адакшым вет тиде курык гыч тыглай мунчалтымым гына огыл, ял калыкын пырля ваш келшен, умылен, татун илымыжым ончыкта, - ойла Нина Баляева.

- Те, кугурак ийготан улыда гынат, курык гычат мунчалтеда, «Соказа сем» ансамбльыште муреда, тувырымат тӱрледа-ургеда. Кузе чылалан жапым муыда?

- 60 ияш улам манын, пӧртыштӧ гына шинчыман огыл. Тыге «його чер» пызыра, садлан чыла вере шуаш тыршем, - воштыл вашешта.

Чын, эртак мӧҥгыштӧ шинчет гын, вара нигуш лекме ок шу, садлан чӱчкыдынрак ешдалан жапым муаш тыршыза. А Нина Николаевналан умбакыжат тыгаяк чулым, весела да эн тӱҥжӧ таза лияш тыланена.