Грипп деч аралалтса

Грипп шкеж нерген кузе палдара? 

- Температур кӱза (38-40⁰С);

- Нер петыралтеш, кукшо кокыртыш витара, логарыште кыжгыкта, изишак коршта;

- Сӱсандара, айдемылан нелын чучеш, вуй, чогашыл (йол, шылыж) корштат, шинча корштымыла чучеш;

- Аппетит йомеш, южгунам укшинчыкта, йоча-влакын диарей лийын кертеш.

Интоксикаций вич кече наре шуйна. Температур кужу жап ок воло гын, тиде осложнений тӱҥалме нерген шижтарен кертеш. 

Моло еҥлан ынже пиж манын, грипп дене черле еҥ мӧҥгыштӧ кодшаш. Эмлалтме радамым, тудым ончымеке, врач палемдышаш. Черле еҥ йол ӱмбалне коштшаш огыл, «постельный режимым» шуктыман. Тыгай годым витаминлан поян фруктым да пакчасаскам кочман, вӱдым шуко йӱман. Черланымын икымше кечылаштыжак антибиотикым кочмаш - кугу йоҥылыш. Антибактериальный препарат-влак вирусым сеҥен огыт керт, сай микрофлорым пытарат да иммунитетым лушкыдемдат. Антибиотикым осложнений (бактериальный инфекций ушнен гын) лийме годым веле врач темлышаш. 

Грипп ваштареш эн сай профилактикылан вакцинаций шотлалтеш. Вакцинын составше ий еда вашталтеш. 

Грипп деч кузе аралалтман? 

- Кидым чӱчкыдын да сайын мушса; урем гыч толмеке, нерымат мушса;

- Черле еҥ деч кораҥ коштса;

- Пӧлемыш чӱчкыдын яндар южым пуртыза; пӧлемым вӱдыжгӧ лапчык дене эрыктыза;

- Шуко еҥ погынымо верлаште лияш ида тырше;

- Витамин С ятыр улман продуктым шуко кочса;

- Калык чумыргымо верлаште аралыше маскым чийыза;

- Вашлийме годым икте-весылан кидым пуымо, ӧндалалтме деч посна саламлалтса; 

- Ешыште черле еҥ уло гын, врач деч полышым йодса.

- Шӱргым, шинчам, нерым лавыра кид дене ила логал;

- Паша верыште але ешыште еҥ-влак черланеныт гын, врач дене каҥашен, инструкций почеш профилактикылан противовирусный препарат-влакым йӱаш тӱҥалза. 

- Таза илыш-йӱлам шуктыза, мален темза, кочкыш сбалансированный лийшаш, физкультур дене заниматлыза.