Жап эрта - шарнымаш ила

«ЧОЛМАН» ГАЗЕТЫМ МАX-ЫШТЕ ЛУДЫНА!

Художникын илыш корныжо Балтач районысо Йыванай ялыште тӱҥалын. Тудо ача-аважым эр йомдарен, йочапӧртыштӧ шуаралтын. Туштак сӱретлаш шӱмаҥмыже палдырнен да варажым уло илыш пашашкыже савырнен. Георгий Калитов тале живописец, Российысе Художник-влак ушемын еҥже, Салават Юлаев да Яныш Ялкайн лӱмеш премий-влакын лауреатышт веле огыл, тудо тӱрлӧ шӧрынан айдеме - уста педагог, краевед, писатель да философ - лийын.

Георгий Гайнияхматович уло ӱмыржым шочмо республикыжлан да калыкшылан служитлыме пашалан пӧлеклен, Башкортостанын да марий калыкын тӱвыраштышт келге кышам коден. Георгий Калитовын усталык поянлыкше - тиде шочмо кундемым, марий калыкым йӧратымаш, келге да чон гыч лекше пагалымаш.

Педагогика пашаже самырык живописец-влакын ятыр тукымыштлан чын негыз лийын. Георгий Гайнияхматович тунемшыже-влакым сӱрет техникылан гына огыл туныктен - тудо, кеч-могай илыш тергымашым ончыде, моторлыкым шижын, образ дене шонкален да шке призванийлан ӱшанле лийме моштымашым куштен. Тудо шке почешыже поян сылнымут паша-влакымат коден, тушто тудын уш-акыл пӱсылыкшӧ да национальный койыш-шоктышым келгын умылымыжо палдырнен.

Шарнымаш оҥам почмаш - тиде илышыште пеҥгыдылык, пашам йӧратымаш да искусствылан служитлыме шотышто пример улшо айдемым чот пагалымаш. Ынде эртен кайыше кажне еҥ, оралтысе пӧртын пырдыжше воктек шогалын, йочапӧртын воспитанникше гыч живописьын лӱмлӧ классикше марте корным эртыше мастарын историйжым шижын кертеш.

Георгий Калитовым шарнымаш землякше-влакын шӱмыштышт, сӱретше-влакын чияштышт да ӱмыржӧ мучко шуктымо суапле пашаштыже ила. Тудын лӱмжӧ Башкортостанын шӧртньӧ тӱвыра фондышкыжо курымешлан возалтын, творчествыште чыным кычалше-влаклан корным ончыктышо шӱдыр лийын кодын.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!