+13 °С
Облачно
Тӱвыра да мер илыш
2 Сентября , 06:43
Ик ешла келшен илат
«Тӱрлӧ койыш, тӱрлӧ тӱс да йылме, тӱрлӧ муро, тӱрлӧ куштымаш. Кажныже шке калыкшылан шерге, сылне, ныжыл, лишыл, курымаш…» Тыге аклаш лиеш 26 августышто Шаран селаште эртарыме «Икоян ешыште» фольклор пайремын тӱҥ шонымашыжым.
Авторын колтымо фото.
«ЧОЛМАН» ГАЗЕТЫМ МАX-ЫШТЕ ЛУДЫНА!
Районышто илыше вич тӱрлӧ калык сценыште ожнысо пайрем йӱлаж-влак дене палдарыш. «Родные узоры» руш вокальный ансамбль уржа-сорлам мучашлыме «Дажинки» пайремым, «Родничок» чуваш калык фольклор ансамбль мыскара мурымаш-куштымашан кас шинчымашым, «Нагыштар» башкир калык ансамбль весела муро-влакым, «Яшь йорэклэр» татар калык фольклор ансамбль качымарий суртышто у шешкым вашлийме, «Ош пеледыш» марий калык фольклор ансамбль ӱдыр налаш кайыме йӱлам мастарын модын ончыктышт.
Коллектив-влакын выступленийыштым кугу пеледыш аршаш дене таҥастараш лиеш. Кажныже икте-весыжым ешарен сӧрастарыш. Тӱрлӧ йылме дене йоҥгышо мурылаште шочмо суртым йӧратыме, ача-авам пагалыме, родо-шочшо-влак дене келшен илыме нерген ойлалтын.
Ме тӱрлӧ улына, но чылан ик кугу еш гай пырля келшен илена, икоян улына. Тиде пеш кугу поянлык! Икте-весынам колына да колыштын моштена, а тӱҥжӧ - икте-весыланна кӱлына! 2026-шо ийым Российысе калык-влакын икоян улмо идалыкышт да Башкортостаныште Келшен илыше кугу ешын идалыкше семын эртарымаш - тиде кажне еҥым лишыл еҥже да пошкудыжо-влак деке тӱткырак, порырак, кумылзо лияш ӱжмаш.
