+20 °С
Ясно
Тӱвыра да мер илыш
10 Июля , 09:39
Искусство - калыкым ушышо вий
Тӱвыра да искусство - тиде чылалан умылаш лийме «йылме». Ме тӱрлӧ улына: тӱрлӧ тӱвырам шымлена, тӱрлӧ йӱлам кучена, тӱрлӧ йылме дене мутланена гынат, моторлыкым, усталык тӱням икгай ужына да шижына. Искусство калык-влакым лишемда, икте-весын тӱвыражым шымлаш, пагалаш, аклаш тарата, калык кокласе келшымашым вияҥда. «Бирский пленэр: От сердца к сердцу» - тыге йоҥген сӱретче-влакын июнь мучаште Бирскыште эртыше VI тӱнямбал Арт-симпозиумышт. Кугу форумым Россий калык-влакын икоян улмо идалыклан келыштареныт.
О.В. Тамиева (покшелне) да Арт-симпозиумыш мийыше сӱретче-влак. О. Тамиеван колтымо фото-влак.
«Бирская крепость» паркысе пленэрыште.
О.В. Тамиева А.В. Пеговын эртарыме мастер-классыште.
«ЧОЛМАН» ГАЗЕТЫМ МАX-ЫШТЕ ЛУДЫНА!
Тудын пашашкыже талантан художник, ешартыш образованийын педагогшо, художественный школын изобразительный искусствым туныктышыжо-влак ушненыт. Нуно Уфа, Стерлитамак, Нефтекамск, Агидель, Туймаза, Белорецк, Салават, Дӧртыльӧ олала, Николо-Березовка, Красноусольский селала веле огыл, Москва ола да Российын тӱрлӧ регионлаже гычат толыныт. Тушто элысе да республикысе лӱмлӧ художник, искусствовед, фотохудожник-влакат лийыныт: тиде Россий Федерацийын сулло художникше, академик, Российысе художество академийын вице-президентше Н.П. Чибисов, Башкортостан Республикысе сӱретче-влакын усталык ушемыштын вуйлатыше В.В. Пегов да молат. Тӱнямбал арт-симпозиумыш Нефтекамск оласе технопаркын пашаеҥже-влак О.В. Тамиева ден А.Р. Авхадиева, тыгак художественный школын туныктышыжо-влакат миеныт. Южышт шке жапыштыже Уфасе наука да технологий университетын Бирск филиалжын (Тунам «кугыжаныш социально-педагогический академий» маналтын.) художественно-графический факультетшым тунем лектыныт.
Арт-симпозиумын программыже путырак поян да оҥай лийын. Сӱретче-влак пленэр годым «Соколок» паркыште пӱртӱсым, «Архитектурный вечерний пейзаж» пленэрыште кастенсе олам, «Бирская крепость» паркыште панорамный пейзажым, тыгак историй шӱлышан олан уремлаштыже аралалт кодшо ожсо купеч особняк-влакым сӱретленыт, «Живопись без стен: история развития отечественной пленэрной живописи» лекцийыште шинчымашыштым келгемденыт, профессиональный лӱмлӧ сӱретче-влакын эртарыме «Основы студийной сьемки - исторический образ», «Дыхание цветов: от этюда к картине» тӱрлӧ мастер-классыште шуаралтыныт, фотохудожник М.С. Квитанцеван калык вургемым чийыме фотосессийышкыже ушненыт. Сӱретче-влак тыгак эрвел калыкын тӱвыражым шымленыт, эше пӱртӱсыштӧ туркмен да узбек калык вургеман модель-влакым сӱретленыт, картиным ямдылыме техникым лончыленыт, икте-весын паша опытшым шымленыт. Туныктышо-влак тыгак квалификацийым кӱкшемдыме курсым эртеныт.
Арт-симпозиумыш погынышо сӱретче-влакын яра жапыштат усталык шӱлышан лийын. Нунылан прикладной искусствын художникше Г.А. Павлова Бирск олан исторический верлашкыже (снимкыште) экскурсийым эртарен, тӱвыра наследийын оҥай объектше-влак дене палдарен. Горохов, Чирков купеч-влак, Марфа Морозова купеч ватын илыме усадьбыштым ужаш моткоч оҥай лийын. УУНиТ-ын Бирск филиалжын музейышкыже да сӱрет галерейышкыже экскурсият сай шарнымашым коден. Сӱретче-влакын вич кече жапыште ямдылыме усталык пашаштат тӱвыргӧ лектышан лийын: тӱрлӧ темылан сӱретлыме радынаштым нуно пытартыш кечын иктешлыше выставкыш чумыреныт.
