«Кушеч окса йӱк шокта»

«ЧОЛМАН» ГАЗЕТЫМ МАX-ЫШТЕ ЛУДЫНА!

8 июльышто - еш, йӧратымаш да ӱшанле улмо кечын - Башкортостан Республикысе Национальный тоштерыште «Кушеч окса йӱк шокта» этнографий выставкым торжественно почыныт. Экспозицийым Марий Эл Республикын Тимофей Евсеев лӱмеш Национальный тоштерже дене пырля ямдылыме. Проект Российысе калык-влакын икоян улмо идалыкыштлан, Башкортостан Республикыште кугу да келшен илыше ешын идалыкшылан келыштаралтын да «Многоцветье России» тоштер акций кышкарыште илышыш шыҥдаралтеш. Ончер марий тӱвыран, йӱла кидпаша да шӱм-чон поянлыкын поянлыкшым почын пуа. 

Почмо церемонийыште Башкортостан Республикысе Национальный тоштер директорын алмаштышыже Михаил Гаухман, Р.Г. Кузеев лӱмеш УФИЦ РАН этнологий шымлымаш Институтын этнографий пӧлкажын тӱҥ шанче пашаеҥже Ранус Садиков и историк-краевед Александр Изиляев саламлыме мутым ойленыт. Марий эл гыч тоштер-партнёрын директоржо Ирина Якаева пошкырт коллегыже-влаклан шке саламлымашыжым колтен. Кечын сем сӧрастарышыже марий национальный куштымашым йоҥгалтарыше «Байрам» калык куштышо ансамбль (вуйлатышыже Айрат Набиуллин) лийын. Выставкыште чатка тӱран чевер калык костюм, илыш-йӱла ӱзгар, инсталляций да марий калыкын шӱм-чон да материальный тӱвыражым, йӱла веражым да илыш йӱлажым ончыктышо иллюстративный материал-влак ончыкталтыт. Ончер ик тылзе наре пашам ышташ тӱҥалеш.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!