+12 °С
Облачно
Тӱвыра да мер илыш
26 Июня , 14:30
«Кушталташ йодеш чонемже!»
20 июньышто Пÿнчер ялыште «Кушталташ йодеш чонемже!» фестиваль-конкурс эртыш. Ял воктенсе ямле пÿртÿс тушко шуко еҥым чумырен, куштымаш пайрем йырым-йыр куанле шÿлышым шарен. Фестиваль районысо куштышо ансамбль ден пошкудо районла гыч мийыше коллектив-влаклан мастарлыкыштым ончыкташ йӧным ыштен. Калыкнан куштымашыжым пагалыше да аклыше-влакым тиде кече иктыш ушен.
Авторын фотожо-влак.
2024 ийыште Гран-прим сеҥен налше «Юго» куштышо калык ансамбль (Пÿнчер ял) ончаш мийыше-влаклан конкурс деч ӧрдыжтӧ эн сай куштымашыже-влакым пӧлеклен. Пÿнчер гычак «Наследие» изирак ийготан йоча-влакын куштышо коллективышт «Ял мучаште» ден «Ӱдыр модыш» куштымаш-влакым ончыктен. Кок номерыштымат жюри да ончаш мийыше-влак кÿкшын акленыт. Кок ансамбльынат вуйлатышыже, куштымаш-влаклан постановкым шындыше, фестивальлан тÿҥалтышым пыштыше да вуйын шогышо, шуктымо пашажым уло чон дене йӧратыше, Башкортостан Республикысе тÿвыран сулло пашаеҥже А.А. Ивановым палемдыман. Вÿдышӧ-влак В. Кутлуметов ден А. Белоусова сценыш ик коллектив почеш весым ÿжыныт. Тÿрлӧ тÿсан шонанпылла койшо марий вургемым чийыше артист-влак ончаш мийыше калыкым мастарлыкышт дене куандареныт. Ямле сем почеш нунат кушташ лектыныт, верыште шинчен кертын огытыл. Тыгай вий дене шкеж деке сымыстара марий куштымаш, тукым гыч тукымыш куснышо марий койышна, марий йÿлана.
Гран-прим тений кок уста коллективлан: Мишкан РДК пеленсе «Эрвел» куштышо калык ансамбльлан (вуйлатыше Башкортостан Республикысе тÿвыран сулло пашаеҥже И. Имаева) ден Монар СДК пеленсе «Ший памаш» куштышо коллективлан (вуйлатыше С. Петрова) - пуымо. «Кугу ансамбль-влак» номинацийыште жюри кокымшо степенян диплом дене Пӱнчер СДК пеленсе «Наследие» куштышо коллективым (вуйлатыше А. Иванов), «Изирак ансамбль-влак» номинацийыште 1-ше степенян диплом дене Бирск ола гыч «Марий кас» куштышо коллективым (вуйлатыше В. Абдуллин), 2-шо степенян диплом дене Ардаш гыч «Кечыйол» куштышо коллективым (вуйлатыше Д. Хамитова), 3-шо степенян диплом дене Тынбай СДК пеленсе «Рвезылык» куштышо коллективым (вуйлатыше В. Янситова) палемден. «Соло» номинацийыште икымше степенян дипломым С. Валиевалан (Пекшек ял), конкурсышто усталыкым ончыктымылан дипломым Р. Изергиналан (Кугу Шӱкшан ял, Бурай район) кучыктеныт. «Рвезылык» (Кульчубай ял, вуйлатыше Т. Ямаева), «Ош вис-вис» (Бурай район, Кугу Шӱкшан ял, вуйлатыше Л. Минлина), «Пеледыш аршаш» (Корак ял, вуйлатыше Д. Николаева) коллектив-влакымат жюри конкурсыш ушнымыштлан диплом дене суапландарен.
Фестивальым мучашлыме, но марий куштымашын моторлыкшо, вийже ончаш мийыше да куштышо коллектив-влакын чоныштышт эше кужу жап илаш тÿҥалеш.
