+15 °С
Ясно
Тӱвыра да мер илыш
24 Июня , 14:22
Уфаште Всероссийский йоча фольклориада эрта
Таче Уфаште III Всероссийский йоча фольклориада тӱҥалын. Калык-влакын икоян улмо идалыклан лӱмлымӧ кугу тӱвыра форумыш йоча-влак элын 80 регионжо гыч чумыргеныт.
«ЧОЛМАН» ГАЗЕТЫМ МАX-ЫШТЕ ЛУДЫНА!
Фольклориадыште, Саха Республика (Якутий) гыч тӱҥалын, Калининград область ден Луганск калык республика марте 78 коллектив да 8 солист усталыкшым ончыкта. Йоча-влак кундемыштын тӱвыражым калык муро, калык куштымаш, калык семӱзгар да фольклор, йӱла ден калык модыш жанрлаште палдарат. Таче, Фольклориадым почмо кечын, тӱрлӧ кундем гыч толшо уна-влак рӱдолаште Келшымаш хороводыш ушненыт, калык вургемым чиен, уремла дене ошкыл эртеныт. Республикысе Национальный музейыште «Наследие VI Всемирной фольклориады» выставкым почыныт. Эрла «Торатау» конгресс-холлышто «Фольклор и дети. Через традиции к единству» научно-практический конференций лиеш, тыгак йоча-влак «Первомайский», «Дёмский», «Волна» да Якутов лӱмеш парклаште эртарыме концертыште мастарлыкыштым ончыктат, кастене калыкым республикысе коллектив-влак да AY YOLA группа куандара. Фольклориадым 26 июньышто мучашлаш палемденыт, тушто ӱжмӧ уна семын Zainetdin этно-шоу усталыкшым ончыкта увертара «Башинформ».
