Натальян фототӱняже

Нефтекамск олаште илыше Наталья Шамыкаеван фотожо-влакат путырак сӧрал улыт. Тудо шке пашаже-влакым интернетысе соцкылыште «Наталин фототӱняже» лаштыкеш вераҥда. Фотолаштыже пуйто нимо ӧрыктарышымат огына уж - теве оласе але ялысе илыш, урем-влак, эҥер сер, шыташ тӱҥалше нӧшмӧ, олмапу да ломбо пеледыш… Но тыгодымак, келшыше ракурсым муын, ончалтышнам эн оҥай детальыш савыралын, пӱртӱс лоҥгасе чонан але чондымо изи падырашымат устан ончыктен, кечын кучылтмо арверым моштен вераҥден, шонкалаш, эскераш тарата да чонышто ласка, поро шижмашым ылыжта.    

«Фото - мыйын хобби, йӧратыме сомылем. Тудо кумылым нӧлташ, чоным пойдараш полша. Чонан, сылне, илыш дене шолшо тӱням ужын, шкенан илышнат у, сылне чия дене сӱретлалтеш, у шонымаш дене пойдаралтеш. Йырым-йырысе тӱням, пӱртӱсым, еҥ-влакым да молымат кажне еҥ шке семынже ужеш, а мыланем нуно, фотографийлаштем могай улыт, тугай кончат. 

Ончыч профессиональный фотоаппарат дене пайдаланем ыле, но вет тудым эре пелен нумалын от кошт. Садлан кызыт чӱчкыдынракше телефон дене возгалем. Ты пашалан изинек шӱмаҥынам», - каласкала Наталья.

Таче тыланда Н. Шамыкаеван икмыняр фотоэтюдшым ончалаш темлена. Кумылда лиеш гын, теат, лудшына-влак, шке оҥай пашада-влакым «Чолман» газетын «Вконтакте» лаштыкышкыже колтен кертыда.