+18 °С
Раш
Тӱвыра да мер илыш
8 Апрель , 09:22
«Чон сандалык»
Тыге лӱмден Светлана Салиева (снимкыште) Нефтекамскысе Печать пӧртыштӧ савыктыме у сборникшым. Сылнымут аланыште шукертак палыме авторын усталык пашаже лирический шӱлышан, почеламутшо-влак пуйто шулдыраҥше кайык гай книга лаштык гыч кумда кавашке чоҥештен кӱзат да мурсемышт дене пӱртӱсым, шочмо верым моктат, шочмо калык дене чон почын мутланат.
Лывырге йылме дене возымыжо чон шижмашыжым ныжылгын почын пуа. Тыге лудшо тудын кӧргӧ сандалыкше нерген гына огыл, пӱтынь тӱняужмашыже, илыш нерген шонкалымашыж дене палыме лиеш. А кунам почеламут корныла муро гай йоҥгат, тунам тиде сылнымутым чын поэзий манаш лиеш. Светлана Салиеван усталыкшат тыгай кӱкшытыш шуын. Ты сборникыш почеламутшылан возымо муро-влакымат нотышт дене, а эше шкенжынак рушла гыч кусарымыжым пуртымо.
Савыктышым лудын, авторын илышлан куанымыжым шкендын шижмашет дене таҥастарет: йӧратымаш, ава пиал, шочмо кундем да эл нерген кугешнен воза, но тыгодымак осал деч порым ойыркала, саманын толкынжо тӱрлӧ семын вашталтме годым тургыжланымыжым, ойго дене леведалтше кумылжымат ок шылте.
Тичмаш сылнымут пашаж дене тудын сборникшым кидышкыда налын палыме лийын кертыда.
