Шкаланышт шкеак ямым пуртеныт

Тиде клубыш ийготым чумырышо ӱдырамаш-влак мият, нуным чон йодмо тӱрлӧ сомыл - кидпаша, сад-пакча, калык йӱла, спорт - иктыш уша, жап лийме годым пырля чумыргаш тарата. Усталык клубын еҥже-влак специальный военный операцийын салтакше-влакланат полшат - нунылан шокшо носким пидыт, окопышто кучылтмо сортам ямдылат да молат. Уста ӱдырамаш-влак тыгак марий калык йӱлам, тӱвырам, историйым аралат.

У ий вашеш «Кудесница» клубын еҥже-влак ялысе библиотекыште пайрем шӱлышан вашлиймашыш чумыргеныт. Нуно «Как встречают Новый год люди всех земных широт» путешествий шотан модмаште уш-акыл пӱсылыкым тергеныт, тугодымак шочмо ялыштышт У ийым вашлийме дене кылдалтше оҥай тат-влакым шарналтеныт, оҥай конкурсышто таҥасеныт, лотерей модмашыш ушненыт, Йӱштӧ Кугыза да Лӱмӱдыр дене пырля У ий кож йыр муреныт-куштеныт, а вара чылан пырля сийым погымо ӱстел йыр чумыргеныт...