Вучыза, миен шуына

Авторжо - Пошкырт марий Александр Арзайн, шке кундемыштыже лийше илыш сӱрет негызеш тугай оҥай пьесым возен, шонен ӧрат. Пошкудо ялыш презым налаш мийыше рвезе-влак родо-шочшышт дене уна лийынат, ӱдырым тулартенат шуктат, сӱанымат тарватат. Пайремым эртарыме йӱла, еш кокласе кыл, ӱдыр да каче верч кучедалмаш, пошкырт марий-влакын шонанпыл тӱсан вургемышт, чапле муро-куштымаш - чыла тиде ик спектакль кумдыкыш шыҥдаралтын. Сценыште сӱрет почеш сӱрет туге писын вашталтеш - эскерен веле шукто.

Тиде комедий лӱмынак Пошкырт кундемыш гастроль дене наҥгаяш манын шындалтын. Сандене моткочак ӱшанена: родо-шочшо калыкнан кумылжым тудо савыра. Тӱҥ геройым Пошкырт кундемын эргыже Генрих Тимиряев модеш. Толза, ончыза, аклыза! Тыгайым нигузе ужде кодаш ок лий!

А эше… А эше спектакль деч вара мемнан артистна-влак ончаш толшо-шамыч дене пырля мурен-кушташ тӱҥалыт. Ӱшанена, тендан тале гармонистда-влак шке музиканышт дене толыт да вашлиймаш касым сӧрастараш полшат. Шижыда, шокшо лийшаш!

Тыгеракын, 16 сентябрьыште «Микулан - презе, Якулан - ӱдыр» спектакльым Уфаште М. Карим лӱмеш самырык-влаклан национальный театрын сценыштыже модын ончыктена. Вара корно Бирск олаш, тушеч Мишканыш, Калтасаш да Нефтекамскыш шуйна. 

Кечывалым тыгак йоча-влаклан «Нӧнчык патыр» («Богатырь из теста») марий йомакым ончаш темлена.

Чыла уверым Шкетан театрын сайтыштыже муаш лиеш.