Фестивальым калык тӱвыралан пӧлекленыт

Пайремын программыжат поян ыле. Районысо предприниматель-влак моло-влакым «йыргешке ӱстел» йыр мӧрым ончен куштымо паша опытышт дене палдарышт.

Тиде кечынак Шаран районын Почетный гражданинже, Башкортостан ден Татарстан республика-влакын калык артистышт Фан Валиахметовлан памятникым почыч. Тыгай лӱмлӧ мероприятийыш артистын икшывыже, шочшыжо-влак, тыгак Р.А. Баталова толыныт ыле. 

Артистым шарныме лӱмеш музиканче-влак тальянка дене ямле семым шоктышт, кок республикын лӱмлӧ артистышт-влак кугу концертым ончыктышт. 

Фестивальыш Чекмагуш, Буздяк, Краснокам, Туймаза, Аскын, Бакале, Шаран районла да Дӧртыльӧ ола гыч усталык коллектив-влак чумыргышт. Пайремыш толшо кажне команда лӱмым, девизым, мурым, художественный номерым, ӱстел сийым ямдылен. Ӱстелыште мӧр дене ямдылыме могай гына сий лийын огыл! Самоварысе шокшо чай, мӧр компот, мелна, мӧр варене, торт да моло кочкышыжат... Чыла вере пайрем шӱлыш озаланен. Тамле деч тамле, кок метран кугу мӧр когыльым марий предприниматель Н.М. Давлетован коллективше ямдылен, тудым пайремыш толшо кажне еҥ тамлен кертын.

Усталык коллектив-влакын тыршымыштым жюри аклен. Тушто Башкортостан Республикысе тӱвыран да искусствын лӱмлӧ еҥже-влак пашам ыштеныт, тиде Альмира Куватова, Фирдус Шарафуллин, Ямиля Бикбаева, Гульназ Кутуева, Гульгина Баймурзина, Фархизя Харисова.

Шаран район гыч «Ихлас» фольклор коллектив «Еләкле йәй - самауырлы сәй» конкурсышто Гран-прим сеҥен налын, «Ош пеледыш» ансамбль 2-шо степенян, Краснокам район гыч «Пеледыш аршаш» коллектив 3-шо степенян лауреат лийыныт. «Тәмле!» калык кочкыш конкурсышто Акпарс школын коллективше кокымшо верым айлен. 

Жапын-жапын йӱр йӱрӧ гынат, пайрем кумыл нигӧн ыш воло. Изижат, кугужат тӱрлӧ таҥасымашлаште, конкурслаште вийыштым, мастарлыкыштым, чолгалыкшым ончыктен кертыч.