Вашкыл у кӱкшытыш нӧлталтын

Эксперимент шотан тиде постановкым кок театр пырля Тӱнямбал театр олимпиадыште Казаньыште 14 июньышто модеш.  А сентябрьыште нунын корнышт Санкт-Петербургыш шуйна, артист-влак Александринский национальный театр сценыш лектыт. Марий театр тиде спектакль дене тыгак икмыняр  фестивальышке ушнаш ӱжмашым налын. 

Шкетан театр тыгак шыже тӱҥалтыште Пошкырт кундемыш кугу гастроль дене мия.  Тиде гана темлыме «Микулан - презе, Якулан - ӱдыр» спектакль калыклан поснак келша манын ӱшаныме шуэш. Вет тудым Пошкырт кундемысе автор Александр Арзайнын пьесыж почеш шындыме.  Тӱҥ герой Якун образыштыжат - Калтаса  районын шочшыжо,  артист Генрих Тимиряев. Тыгак ик рольым Артем Асмаев чоҥа. 

Спектакль пӱтынек эрвелмарий-влакын унам вашлийын ужатыме, пайрем, сӱан йӱлалан пӧлеклалтын. Сылне вургем, чапле куштымаш-влак тудым чот сылнештарат. Кеч-мо гынат Марий Элыште илыше Пошкырт вел марий-влак «Микулан - презе, Якулан - ӱдыр» спектакльым пеш сайын вашлийыныт.  Эсогыл Башкортостан гыч лӱмын ончаш толшо-влакат лийыныт. 

Тыге, 16 сентябрьыште тиде спектакльым Уфаште М. Карим лӱмеш самырык-влаклан национальный театрын сценыштыже модын ончыктат.  Вара корно Бирск олаш, тушеч Мишканыш, Калтасаш да Нефтекамскыш шуйна. 

Кечывалым тыгак йоча-влаклан «Нӧнчык патыр» марий йомакым ончаш темлат.  Тудым еш деч ончаш пайдале. Моло йомакысе семынак тыштат сай ден осалым ойыраш, кугуракым пагалаш, ваш полшен илаш кӱлмӧ темым тарватыме.

Чыла уверым Шкетан театрын сайтыштыже муаш лиеш. Тыгак билетымат ужалымашке уже лукмо. Ӱшанена, пошкырт кундемысе родо-шочшына-влак Шкетан театрым ончычсо семынак йӧратат да тудын дене вашлиймашым шӱм вургыж вучат.