«У ийын корныж дене»

Тиде пайремын тӱҥ организаторжо - «Дюна» кевытыште тыршыше коллектив. Нуно уремыште йоча-влаклан У ий кожым сӧрастареныт. Пайремыш чылан костюмым чиен лектыныт, шкеак рольым модыныт, пешак активный да весела ӱдырамаш улыт. Погынышо-влаклан кож воктен пайрем персонаж-влак дене войзалташат йӧнан ыле, шарнен илаш шуко фотом ыштышт.

У ий пайрем саламлымаш деч посна ок эрте. Мутым кевытын озаже, индивидуальный предприниматель, мероприятийын спонсоржо Н.М. Давлетовалан пуышт. Эн кугу саламлымашыже ял калыклан да уна-влаклан лие. «Тынар калык погынымылан, пайремна рӱж эртымылан кевытыште ыштыше Л.А. Мухаметгареевалан, А.М. Исламовалан, О.Э. Шуматовалан да Д.Б. Третьяковалан кугу таум каласем, умбакыжат калык дене пеҥгыде кылым кучаш, кумылыштым нӧлтен илаш тыланем», - каласыш Надежда Мурзагареевна. Тудо СВО-што улшо салтак-влакын аваштлан, кугу ийготан шоҥгыеҥ-влаклан 2025 ийлан «Чолман» газетлан подписной квитанцийым пӧлеклыш, марла газет ден журналым налаш да лудаш кӱлмӧ нерген ойлыш.

Уремыште изижат-кугужат ямле сем почеш мурышт-куштышт, шукыжо пӧлекым модын нальыч. Костюмымат ышташ ӧрканен огытыл. Петр Первыйын да Екатерина Втораян костюмыштым чийыше герой-влак чылаштым ӧрыктарышт. «Петр Первый» погынышо-влаклан У ийын историйже да эртыше корныж нерген, кузе да кунам У ийым 1 январьыште палемдаш тӱҥалме нерген ойлен пуыш. СВО гыч отпусклан толшо рвезе С.С. Третьяков, Йӱштӧ кугыза лийын, аваже Д.Б. Третьякова, Лумӱдыр вургемым чиен, йоча-влакым куандараш тыршышт. Нуно ӱдыр-рвезе-влакым мураш-кушташ, почеламутым ойлаш кумылаҥдышт. Т.О. Алтынбаева пайремым пеш веселан вӱдыш, погынышо калыкым тӱрлӧ модыш дене модыктыш. Тудлан А.В. Исламова да Д.А. Казимов полышкалышт. Пайремыш толшо уна-влак тӱрлӧ таҥасымаште шке вий-куатыштым да мастарлыкыштым терген кертыч: мешак дене куржын ӱчашышт, тюбинг дене мунчалтышт, тӱрлӧ семын модыч. Йӱштӧ Кугыза ден Лумӱдыр модшо-влакым приз дене палемдышт. 

Пайрем лотерей модмаш дене мучашлалте. Тӱҥ приз - чонан агытан - ялысе почтальон Надежда Курмакаевалан лекте.

У ий пайрем чыла уналан келшыш. Кажныже пӧлек мешакыштым кучен, мӧҥгӧ шаланышт. Организатор-влаклан пеш кугу тау, таза да пиалан лийышт!