Тошто Яш, кузе илет - поро, сай мо шӱлышет?

Тачысе саманыште калык дене тыгай шинчаваш мутланымаш-влак шуэнрак лиедат. Поснак тора яллаште. «Чолман» газетын тӱҥ редакторжо (Тудо кызыт Нефтекамск печать пӧрт директорын пашажымат шукта.) Игорь Иванович Губаеват тиде вер-шӧрыштӧ шукертак, коло ий утла, лийын огыл. Садлан, мутат уке, ойлышаш шомакат, йодыш-влакат ятыр погыненыт. Чумыргымеке, эрвелмарий-влакын илышышт дене кылдалтше пӱсӧ проблема-влакымат тарватыде ок лий. Еҥ-влакат ял илыш дене кылдалтше тургыжландарыше йодышыштым - ял марте шуйнышо корным тӧрлатыме, йоча-влаклан школлаште тунемме учебник-влак тоштемме, у пособийлаште мут-влакым утыжым марлаҥдыме да моло - нерген чон вургыжын ойлышт. Кугезе-влак деч кодшо шкенан ойыртемалтше тӱснам, йӱланам йомдараш огыл манын, мемнан, эрвелмарий-влакын, калык вургемна могай лийшаш нерген мутым лукмашат ятыр шонкалымашым шочыктыш. 

Мурышо-куштышо усталык коллектив деч посна ялыште могай ям? Л. Шакирьянован вуйлатыме Тошто Яш клуб пеленсе «Кумыл» мурышо ансамбль (Л. Изибаева, Н. Тимирбаева, Е. Нафикова, Е. Аптриева, Е. Ахметдьянова) вашлиймашлан чылт пайрем шӱлышым пуртыш. Гармоньчо К. Искибаевын шоктымо семже почеш муро-влакым яндарын йоҥгалтарышт. Эше тиде кечын вер-шӧрын историйже, кугезына-влакын илыш-йӱлашт дене палдарыше оҥай верым - библиотекым - ончалашат йӧн лие. Тудым «музей-библиотека» манаш гын, утларак келшен толеш, очыни. Ожно ял озанлык пашаште тыршыше кована-кочана-влакын пашашт нерген фотостенд, акрет годсо арвер, саркурал… Нуным кундемнан историйжым шымлаш шӱман библиотека пашаеҥ И. Мандиев ятыр ий чумырен, стеллаж-влакеш чаткан вераҥден. Садлан тушко еҥ-влак книгалан веле огыл, музейысе экспонат-влакым ончалашат мият. Лудаш йӧратышыже, лудын тунемшыже тачысе саманыштат библиотекыш садак пурен лектеш. 

Вашлиймаш годым родо-шочшылан, пошкудылан марла календарьым наледышт, газетлан подпискым ыштышышт пӧлек модмашыш ушнаш квитанцийым пуэн колтышт. Ончыкыжым ужын-вашлийын мутланаш веле огыл, пырля погынен муралтыме нергенат ойым пидыч. Яшыште, воктенсе яллаштат «Чолманлан» возалтше лудшына-влак ешаралтыт гын, эшеат сай, конешне. Тунам чумыргымо творческий вашлиймаш утларак пайдале да веселарак лиеш ыле…