Оҥай да пайдале вашлиймаш

Школын леведышыжым ачалаш кӱлеш, садлан, тиде сомылым 2025 ийыште ППМИ программа почеш шукташ манын, погынымашыште ончыкылык паша планым каҥашышна. Тышке «Чолман» газетын тӱҥ редакторжо И.И. Губаевым ӱжынна ыле. Пеш кугу тау Игорь Ивановичлан, тора корным да Нефтекамск печать пӧрт директорын пашажымат шуктен шогымыжлан жапын чӱдылыкшым шотыш налде, мыланна полшаш толмыжлан. Школ илыш дене пырля тӱвыра темымат авалтышна, газет, шочмо йылме дене лудмаш да мер илыш нерген кутырышна. Ялысе почтальонна Л.Н. Захарова тыштак «Чолман» газетлан возалташ кумылаҥше-влаклан квитанцийым возен пуыш. Умбакыжат подпискым ыштена. Ме, тӱрлӧ сферыште тыршыше марий-влак, икте-весылан полшен илышаш улына. Тыге шонымашнам шукташ, пашанам вораҥдараш куштылгырак лиеш. А варажым, пагалыме унан толмыж дене пайдаланен, туныктышо-влакын «Ныжыл сем» да ялысе «Шочмо вож» ансамбль-влак дене пырля репетицийым эртарышна, мучашлан «Кандырам» кушталтыде ышна чыте.