«Песни от всей души» передачыште лийынам

Съемкым ыштыше тӱшка мыйын нерген сюжетым возаш етшен огыл, садлан верысе «Некст т/в» телеканалын операторжылан ӱшанен. Но возымо сюжетын материалже Москваште молан дыр почылтын огыл. Туге гынат чон почын мутланымаш ылыжмылан кӧра мыйым сад-пакчалан, мландылан лӱмлымӧ «Песни от всей души» передачыш ӱжаш ойым луктыныт. Репертуарем гыч В. Харитоновын мутшылан возымо Е. Птичкинын «Я люблю свою землю» мурыжым ойыреныт. 

13 октябрь рушарнян Краснокам район Кокасолаш Лидия Ивановна шочмо акамын пӧртышкыжӧ съемочный группа тольо. Тушто нуным мый, Ирина акам, Серафима Кузьминична авам да Роман веҥына вашлийна. Сюжетым возаш казамат лӱштышна, чывым пукшышна, пум оптышна, мончаш олтышна, мурым мурышна, когыльым кӱэштна… 

Москва луман, йӱран, йӱштӧ мардежан игече дене вашлие гынат, чонышто каласен моштыдымо куан кумыл озаланен, вет мыйым «Ханой - Москва» отельысе 20-шо пачашыште чапле апартамент-влак вученыт! 

Съемкылан мемнам ямдылаш, шотыш кондаш гримерым пуэныт. Выступленийым эн ончыч мый репетироватлышым. Тургыжланышым, конешне. Но, шкем мӧҥгыштӧ улмо гаяк шижса манын, режиссер Сергей Шестаков мемнам вигак лыпландарыш. Гримеркыш баянист Валерий Семин ден гитарист Тимур Ведерников пурышт. Репетицийыште «Чевер ӱдыр, мотор каче» такмакем-влакым да ӱстел йыр шинчыме годым йоҥгалтарыме Н. Коольын мутшылан возымо А. Александровын «Там вдали, за рекой» мурым мурышым. Тургыжланыме кумыл эркын-эркын шулен йомо... Редактор-влак мемнам лишыл еҥ гаяк шокшын, поро кумылын вашлийыч. Мыланна, тыгак Белоруссий, Казахстан, Бурятий, Челябинск, Воронеж гыч мийыше кажне еҥлан полшеныт, пеленна лийыныт. Кунам ме, мотор вургеман, сӧрал прическан уна-влак, съемкылан ӱстел йыр погынен шична, мемнан деке Андрей Николаевич Малахов лекте… Ме тудым совым рӱж кырен вашлийна!

Чылаже кок муро дене вич эпизодым возышт. Кажне участникын ойыртемалтше ӱмыргорныжо, чонеш логалше илыш историйже-влак. Шӱм-чоным тунар тӱрлӧ шижмаш авалтен! Мый кумшо эпизодышто выступатлышым. Кызыт тиде съемкым юзо омо семын шарналтем. Андрей Малаховлан, тудын командыжлан пӧлек-влакым кучыктымашат шергакан тат семын ушеш кодын. Вич шагат шуйнышо съемка ик шӱлыш гай эртыш. Икте-весе дене чылан шӱлыкаҥын чеверласышна. Вес гана шарнен илаш фотосессийым эртарышна. 

…Уэш Домодедово - Ижевск корно, шочмо-кушмо вер-шӧр. Салам, шӱмбел Башкортостанем! Пелед, тӱзлане, шочмо кундемем!