Мурышт ныжылге, кумылышт поро, чонышт пушкыдо да шокшо…

Дӧртыльӧ район администраций вуйлыкын пашажым шуктышо С.Р. Ислакаев, тӱвыра да каныме рӱдер вуйлатышын алмаштышыже  Р.М. Баймуратов, верысе ялсовет вуйлатыше Х.М. Хазиев, Нефтекамск печать пӧрт директорын пашажым шуктышо, «Чолман» газетын тӱҥ редакторжо И.И. Губаев, районысо марий тӱвыра автономийым вуйлатыше А.В. Камильянов ансамбльым да тудын вуйлатышыже О.А. Салимовым шокшын саламлышт, калык йӱлам да поро койышым вияҥден, самырык тукымлан арален кодымыштлан тауштен ойлышт. Пайремыш толшо уна-влак «Калык сем» ансамбльын кажне самодеятельный артистшым пӧлек да тауштымо серыш дене палемдышт. А клубыштлан эн кӱлешан да шерге пӧлек 150 тӱжем теҥгеаш сертификат лие, тудым район администраций лӱм дене С.Р. Ислакаев клуб вуйлатыше О.А. Салимовлан кучыктыш.  

«Сертификат - пеш кӱлешан сомылым шукташ кугу полыш, - мане Олег Салимов пайрем концерт деч вара кутырымо годым. - Клуб окна-влакым уэмдаш манын, ик гана веле огыл район администраций вуйлык деке йодмаш дене коштынам. Кугу тау ансамбльнан лӱмгечыжым ял калык дене погынен пайремлыме касыште клубнам ачалаш оксам ойырымыштлан».

Клубышт, такшым, пеш чапле, йоҥгыдо, шокшо, моторын сӧрастарыме, каналтыме вер семын погынаш ял калыклан пеш йӧнан. Библиотекат туштак верланен. Кызытсе илышыште ялыште тӱвыра пашам ворандараш куштылго огыл. Но чылажат айдеме да тудын тыршымыж деч шога. Клуб пашаштат тыгак. Кийыше кӱ йымак вӱд йоген огеш пуро, маныт. Вуйлатышышт мо улыж дене ок серлаге, умбакыжат сайрак лийже манын, мом-гынат эше ышташак тырша. А тыршыше еҥ пашаж дене калыкын пагалымашыжым сула.

И. Губаев Йывачъял калык дене ожнысек тӱвыра кылым кучен илыме нерген  шарналтен ойлыш, оҥай тат-влакымат ушештарыш. Тунам, «Чолман» газет шочмо деч икмыняр ий ончыч, Нефтекамск оласе тыгаяк лӱман фольклор ансамбль кумдан чапланен, тӱрлӧ кундемласе марий-влак деке концерт дене коштын. «Но, - каласыш Игорь Иванович, - йылмым палыме деч посна, марий вургем да мурен-куштымаш дене гына марий калык семын аралалт кодаш ок лий. «Калык сем» ансамбльдан сай могырыш вашталтмыжат раш коеш, репертуарда йӱлам шарныме, тудым калык коклаш шарыме поро койыш-шоктыш дене ятырлан пойдаралтын. А йылмым (Умылаш кӱлеш - калыкым.) аралымаш, уш-акылым вияҥдымаш книга ден газет-влакым лудмаш денат чак кылдалтыныт, садлан «Чолман» газетымат налаш кӱлмым мондыман огыл». Туштак «Чолманлан» возалтше-влаклан да ансамбльлан «Шаршудан изурем» почеламут сборникшым пӧлеклыш.

Икманаш, пайрем кас поро шӱлыш дене пеш веселан да пайдалын эртыш. Погынышо калык уло ялге «Чолман» газетлан возалташ кумылаҥын кодо, а почтальон И. Ишкузина, О. Салимов да вуйлатыме коллективше тидым шукташ тыршена манын ӱшандарышт.