Йоча тӱня. Йомакым марла модыныт да Гран-прим налыныт

Тенийсе тунемме идалык мучаште театрыш коштшо йоча-влак дене В. Сутеевын «Мешок яблок» йомакшым марла шындаш ушышкем толын пурыш. Кӱчык жапыште коллективна дене конкурслан рӱж ямдылалтна: икте вургемым келыштарыш, весе - декорацийым. А ме йоча-влак дене марла мутланаш тӱҥална. Изи артистна-влак кокла гыч коракым модшо ӱдыр гына марла мошта. Эше ныл йочаже марий улыт, но шочмо йылмыштым огыт пале, икмыняржын ача-аваштат марла огыт мутлане. А моло геройжым татар да руш икшыве-влак модыч. Рольыштым тыршенак келыштарышт, эсогыл шкаланыштат чот келшен. Мучашлан пирым модшо руш рвезе тыгерак кугешнен каласыш: «Ончыч кок йылмым палем ыле, ынде марлат ойлен моштем».

«Олма мешак» йомакнам конкурсыш колтышна. Экшыкан тазалыкан еҥ-влак коклаште эртарыме «Жар-Птица России» тӱнямбал онлайн конкурсышто «Театральное искусство» номинацийыште (9-10 ияш-влак тӱшкаште) тудым Гран-при дене акленыт.