Ойлышаш шомакем уло. Унам вашлийын моштена мо?

«Калык погынышаш, акшат кугу огыл», - шонем семынем. Залыш пурен шогалмек ӧрым: еҥже изиш веле! Вигак каласем, спектакль неле. Нигӧ мешайыше ок лий, залыште телефон йӱк ок шокто гын, тӱҥалтыш гыч мучаш марте шинчавӱд денак шинчен лектат. Спектакльын тӱҥ шонымашыже кызытсе илышлан лач веле келшен толеш. Элыште мо ышталтмым чылан палат: кажне кечынак, манаш лиеш, СВО-што вуйыштым пыштыше-влакым тоят. Тидын нерген кызыт изижат-кугужат пала, шонем. Артист-влак рольыштым чон вошт колтенак модыт: шортыт, ала-куштыжо куаненат колтат. Нуным ончен, шинчавӱдым кучаш ок лий. 

Авам «Изина годым Йошкар-Ола гыч артист-влакын толмыштым изин-кугун вучена ыле» манеш. А кызыт? Шотшо-ратше дене вашлийынат огына мошто. Залыште ала-мыняр еҥ веле шинча: ала оксаштым чаманеныт, ала чынак жапышт уке. Умылем, кызыт чыла интернетыште ончаш лиеш, но сценыште модмым нимо дене таҥастараш ок лий. Кеҥежым паша шуко, кӱтӱм пуртыман да монь. Но тыгай артист-влак мемнан деке кажне кечын огыт кошт. Ик гана ушкалым «презе лӱшта» гынат, нимат огыл, пакча емыжыш вӱдым огыда шаве гынат, телым садак шужен шинчаш огыда тӱҥал.

Колледжым тунем пытарымекем, мыламат гастроль дене кошташ пиал логалын. Каласен кертам, мемнан марий калык унам вашлийын ок мошто. Тендан суртышко уна толеш гын, садак чайым йӱктеда вет. Нунат кужу корным толыныт, клубышто ӱстембалне кинде ден чай лиеш гын, тидланат куанат, «Тыште мемнам вученыт» манын шоналтат. Кызытат шарнем: Марий Элыште ала-могай ялыште (районжым каласен ом керт) шоҥго ковай шке ыштыме когыльым намийыш. Шкеже, тоям кучен, пыкше гына ошкылеш. Жапым да вийым муын, лӱмынак спектакль ончаш миен, адакшым яра кид дене огыл.

Кызыт кажне кудышто артистым вашлият. Мурен-куштен моштат ма, уке ма, сценыш лектыт, калыкым погат, а кугу артист-влакым ончаш огыт кошт. Але мӧҥгешла, дискотекыш миет гын, тошкалаш верым от му, шукышт йӱшӧ улыт, мом койышланымыштымат огыт пале. А шонаш, илышым вес могыр гыч ончалаш таратыше мероприятийлаш огына кошт, лучо телевизор ончылно пундышла шинчена. Кеч-могай пашам ыштыме деч ончыч тӱжем гана шоналтыман докан.