Уфаште тӱнямбал книга ярмиҥга эртен

Уфаште Россий писатель-влакын выездной пленумышт, мастер-класс, «йыргешке ӱстел», поэзий, драматургий нерген тренинг, благотворительный акций - чылаже 300 тӱрлӧ мероприятий эртен. «Башкортостаныште нигунам тынар писатель да тынар тӱрлӧ калык чумырген огыл. Тыште эн тӱҥжӧ - элнан литераторжо-влакын икте-весе деке лишкырак лиймышт, молан манаш гын кызытсе куштылго огыл саманыште мыланна поснак пырля лийман», - каласен Башкортостанысе Писатель-влак ушемын вуйлатышыже Айгиз Баймухаметов. 

Книга ярмиҥга тений палемдыме кугу лӱмгече, элысе событий-влакым авалтен. Тиде Уфа олан 450 ияш, Зайнаб Биишева лӱмеш «Китап» башкир издательствын 105 ияш, руш литературын классикше А.С. Пушкинын 225 ияш лӱмгечышт, специальный военный операций.  Площадкылаште «СВОими глазами» книган презентацийже лийын, Донбасслан да Российын у регионжо-влаклан книгам погеныт. «Поро подписка» акций СВО-што улшо салтак-влакын ешыштлан газет ден журнал-влаклан подпискым пӧлеклаш йӧным ыштен.  

«Китап-байрам» тӱнямбал книга ярмиҥгаш уна семын элысе лӱмлӧ писатель, артист-влак толыныт. Тиде писатель, сценарист да продюсер Олег Рой, Моссовет лӱмеш кугыжаныш академический театрын актрисыже, мурызо, телевӱдышӧ, продюсер Ирина Климова, ироний шӱлышан детектив-влакын авторышт Дарья Донцова,  актер да телевӱдышӧ Александр Олешко. Нуно, лудшо-влак дене вашлийын, усталык корнышт дене палдареныт.  

Башкортостан Вуйлык Радий Хабировын пунчалже дене келшышын, «Китап-байрам» тӱнямбал фестивальым Уфаште ий еда эртараш тӱҥалыт.