Алексей Ахмазович самырыкше годым ӧрдыж кундемыште шке вержым да илыш пиалжым муаш шонен. Армий деч вара Ленинградысе (кызыт Санкт-Петербург. - ред.) «Звезда» машиностроительный заводыш пашаш пурен, вара Топливно-энергетический управленийын газ озанлыкым эксплуатироватлыше 3-шо конторыштыжо газ оборудований шотышто слесарьлан ыштен.
Машиностроительный заводышто вич ий физорг пашам шуктен, шкенжынат бокс дене 1-ше разрядше лийын. Яра жапыштыже Выборгысо Тӱвыра полатыш бальный куштымаш кружокыш коштын.
Илышыште чылажат шот дене воранымыла чучын, но садак чонжо дене шочмо-кушмо кундемже пелен лийын. Тыге 1985 ийыште Алексей Иванов Пӱнчерыш пӧртылын да Калинин лӱмеш колхозын 3-шо бригадыжын клубшым вуйлаташ тӱҥалын. 1990 ийыште районысо тӱвыра пӧлкан Пӱнчерысе тӱвыра пӧртшым вуйлаташ шогалтеныт. Ты пашам 24 ий шуктен. Варажым клуб паша шотышто методистлан ышташ тӱҥалын. Чумыр паша стажше 49 ийыш погынен, тушеч 40 ийжым тӱвыра аланыште тырша.
Алексей Ахмазович тӱрлӧ пашам виктарен шога: идалык мучко календарный да калык йӱлаш пурышо пайрем-влакым, изиеҥ-влаклан да кугурак тукымлан мастарлыкым шуарыме кружок-влакым эртара, пырля районысо мероприятийлашке, ӧрдыж яллаш концерт дене коштыт.
Тудо шке пашажым сайын пала, кеч-момат чон йӱлен, вий-куатшым чаманыде ышта, тидлан молымат таратен шога. Коллективше да еҥ-влак дене ик ойыш шуын мошта, каҥашымат пуэн кертеш, сай наставник да йолташ улеш.
Кужу жап тыршен пашам ыштымыжлан, марий калыкын тӱвыражым, йӱлаже-влакым, калык-влак кокласе келшымашым вияҥден шогымылан А.А. Ивановым тӱрлӧ Чап грамот да таумутан серыш дене палемденыт. Тиде Башкортостанын Вуйлыкшын таумутан серышыже, Башкортостан Республикысе Тӱвыра министерствын, Марий Эл Республикысе Тӱвыра, печать да калык-влакын пашашт шотышто министерствын, Мишкан район администрацийын, тӱвыра пӧлкан Чап грамотышт, таумутан серышышт да молат.
Кызыт Алексей Ахмазович «Юго» куштышо калык ансамбльым, «Вӱд толкын» вокальный да куштышо ӱдырамаш, куштышо йоча коллектив-влакым вуйлата. Шкежак куштымаш-влакым шында, «Юго» ансамбльын репертуарыштыже гына 12 куштымаш уло.
Кушкын толшо тукымым марий тӱвыралан шӱмаҥдаш манын, 2016 ийыште Пӱнчерыште «Кушталташ йодеш чонемже» фестиваль-конкурсым эртараш тӱҥалын. Тушко ий еда тӱрлӧ кундем гыч уста куштышо коллектив-влак чумыргат.
Шукерте огыл, Сеҥымаш кече деч ончыч, районысо Тӱвыра полатыште «Кум куэ верч» театрализованный концертым эртарышт. Тушто «Юго» куштышо ансамблят «Элнет вел йыр пӧрдын куштымашым» да «Кандырам» мастарын кушталтен пуыш. Мотор марий вургеман, лывырге кап-кылан ӱдыр-рвезе-влакын тавалтымышт ончаш мийыше-влакланат келшыш. Чаплын шындыме куштымашла гоч нуно пуйто ончышо-влак дене «кутырат», шуко тӱрлӧ шижмашым пӧлеклат.
Коллектив ий еда мастарлыкшым шуарен толеш, ончыкыжат ты кӱкшыт дене гына ынеж серлаге. Алексей Ахмазовичын мутшо почеш, тиде коллектив - кугу еш гай, нуным чылаштымат куштымаш ушен шога. Вуйлатышышт шкежат изинек кушташ тӱҥалын. Тудлан куштымаш - кумылым нӧлтышӧ, куандарыше, уло чон дене шуктымо паша. Тӱҥалтыште, Пӱнчерысе моло йоча-влак семынак, художественный самодеятельность коллективыште йывыртен куштен гын, ынде ятыр ий годсек тысе йоча-влакым сем почеш сылнын, лыжган тарванылаш да тавалташ, калык искусствым йӧраташ туныкта, шке моштымашыжым пӱтынек нунылан почын пуа.
Алексей Иванов - куд икшыван ача. Ынде кум уныкажын кугеммыштым ончен, нунын верч куанен ила. Йӧратыме пашат илышлан вий-куатым ешара. Алексей Ахмазовичым эртыше юбилейже дене саламлена да пеҥгыде тазалыкым, чон ласкалыкым, йӧратыме пашажым уло кумылын, куанен ышташ тыланена.