Поэзий чонышто юарла гынат, тудо куштылгын шочеш манаш ок лий. Светлана Салиеван почеламутшо-влак шонкалаш таратыше, лирический шӱлышан улыт, лудашат куштылго. Возышо еҥым шкенжым от пале гынат, почеламут корнылажым лудын, тудын могай улмыжым, усталыкшым, тӱняужмашыжым образ-влакым икмыняр корно дене почын пуэн моштымыж гыч шижат. Светлана Ивановнан сылнымут пашажат тыгай: лудаш тӱҥалат гын, авторын «сӱретлыме», шонкалаш таратыше тӱняшкыже пурен кает. А мыняр вийым, ӱнарым пуымо тидлан, азам ыштыше ӱдырамаш семын тидым автор шкеже веле пала…
Светлана Салиева сылнымут аланыште тыршымыжлан 25 ий темме лӱмеш 12 апрельыште Мишканыште творческий касым эртарыш. Почеламутым возышо еҥын чоныштыжо поэзий пуйто памаш вӱд гай шырчен йога, мурсем гай йоҥга. Садлан южо почеламутшылан семым шкеак келыштарымыже, муралтен колтымыжо усталык касыш ӱжмӧ унаже-влакым ӧрыктарен огыл дыр. Тудо мурашат пеш йӧрата, ятыр ий годсек ветеран ӱдырамаш-влакын «Мишкан сем» ансамбльышкышт коштеш. Авторын мурыжым пайремыш толшо ансамбль ден мурызо-влакат йоҥгалтарышт. Талант уло гын, тудо телым корно савыртышыште имне тер гыч лектын вочшо вӱдылка гай киен ок код, ешыштат лектышым пуа. Светлана Ивановнан Станислав эргыже РДК-ште йӱк режиссерлан пашам ышта. Изиракше, Денис, Октябрьский олаште искусство школын директоржо улеш, Уфаште З. Исмагилов лӱмеш Искусство кугыжаныш институтышто хорым вуйлатыше дирижерым ямдылыме пӧлкам тунем лектын. Регина пелашыжат тиде институтыштак фортепиано дене шоктышо специалистын дипломжым налын, Октябрьский оласе 2-шо номеран искусство школышто туныкта. Усталык касыште профессиональный музыкантын фортепиано дене классический семым шоктымыжо кумылым вӱчкымӧ гай ласкан йоҥгыш. А Станиславын, тудын Сергей эргыжын (С. Салиеван уныкаже, Уфасе авиационный институтышто тунемеш.) да Денисын гитара дене шоктен мурымышт чонышто посна шижмашым шочыктыш. Живой вокалын да инструментын концертыште профессиональный кӱкшытыштӧ йоҥгымыштым нимо дене от таҥастаре, колыштмет гына шуэш.
Икманаш, С. Салиеван усталык касше поэзийым йӧратыше, семӱзгарлан шӱмаҥаш шонышо, мураш йӧратыше-влаклан искусство аланыш у шинча дене ончалаш, усталыклан кумылаҥдыше сескемым шке чонышто шӱртӧ пырче гай кычалаш таратен гын, творческий пашажлан 25 ийым пуышо автор усталык пасушто эше ик кашым савырен, манаш лиеш.