Ныжылгылык да чаткалык эре модышто лийыт

- Юлия, кузе шонеда, мурышто ушештарыме семын, кеҥежлан сарафан ден тувырым ургыман мо?

- Мыйын шонымаште, тидыжымат, тудыжымат ургыман. Гардеробыштына улшо тувыр ден сарафан нигунам мода гыч огыт лек, стиль, крой да куэм гына вашталтыт, а ныжылгылык да чаткалык эре модышто лийыт.

- Ик жап йӱдалге але посна тӱс-влакым ваш келыштарен чийыме вургемым сайлан, стильныйлан шотлат ыле. А кызыт кеч-могай куэмым, кеч-могай тӱсым ваш келыштараш лиймыла чучеш. Дизайнер-влак тидын шотышто кузерак шонат?

- Мыланна посна тӱс-влакым темлыме, изишак кышкарлаш тӧчымӧ жап шукертак эртен гынат, тыште шуко «но» манмыжат уло. Эреак трендыште лияш манын, тренд-влакын кузе вашталтмыштым эскераш верештеш. Мутлан, Pantone шымлыше институт кажне ийын идалыкын тӱсшым ойырен налеш. Тений тудо йӱдсар ден алым ушышо  «персик пун» тӱсым темлен. Теве ужыда, 2024 ий мучаште кевытлаште тыгай тӱсан вургем лыҥ лиеш. Чумыр ончымаште, тӱс-влакым ойырен налме, нуным ваш келыштарыме шотышто ятыр теорий уло, тидлан тӱс-влакым йӧнештарыме оҥгат полшен кертеш, но, мыйын шонымаште, эн сай йӧнжӧ - чылажымат эскерен-шекланен кошташ да иктешлаш, опытым погаш, чия ден тӱс-влакым шижын мошташ тунемаш. Тендан йӧратыме тӱсда-влак, очыни, чурийландат келшат.

- Кеч-могай ийготан еҥат чаткан койнеже. А те самырык ӱдыр-влаклан, кокла да кугурак ийготан ӱдырамаш-влаклан могай вургемым ойырен налаш темледа?

- Самырык ӱдыр-влаклан кап-кылыштлан да чоныштлан келшыше кеч-могай вургемым лӱдде наледаш темлем - масс-маркет сегментыште кокларак акан тӱрлӧ вургемымат муаш лиеш. Самырык годым огыл гын, кунам эше тыге чолган, шоналтыме семын моторланыман? Кокла да кугурак ийготан-влаклан тӱткырак лийман - вургемым кузе шулмымат, куэмжын могай улмыжымат шотыш налман, вет кап-кылыште сайын, чаткан шинчыше сай качестван вургем - тиде эше статусын ешартыш ойыртемже.

- Пытартыш ийлаште ӱдырамаш-влак ала-молан утларакшым брюкым пагалаш тӱҥалмыла чучеш. Классический юбкан да жилетан костюмым тетла огыт чий мо?  

- Кызытат уло кумылын чият. Вургем денат шке кап-кыл моторлыкым ончыктен моштышо ӱдырамаш кеч-кунамат йытыран коеш, тидым ӧрдыжъеҥат ужеш. 

- Юлия, пашаштыда «индивидуальный пошив» - посна еҥын кап-кылжылан вургемым келыштарен ургымаш - кугу верым налын шога. А тендан мастерскойышкыда коштшо еҥ-влак утларакшым мом урген пуаш йодыт?

- Кызыт тыгай заказым ом нал, манашат лиеш, шке брендемым вияҥдыме сомыллан шукырак жапым ойырынем. Ончыч чыла ургем ыле - икшывылан, ӱдырамаш ден пӧръеҥ-влаклан, эсогыл кугу курчак-влакымат ыштылаш логалын. Еҥ-влак, кевытыште мом ужален огытыл, тудым урген пуаш йодыныт.

- Тыланда этнический тема моткоч лишыл. Шкендан бренд дене ямдылыме вургем ден аксессуарлаште кугезына-влак деч куснышо орнамент-влакымат ужына.

- Мый Йошкар-Олаште шочынам, а вара ешна дене ачамын шочмо Киров кундемысе Уржум районыш илаш кусненна. Ял илыш тӱрлӧ чиялан поян: йырым-йыр мучашдыме пасу, чодыра да эҥер-влак шарлен возыныт. Мыйын ача-авамат калыкнан йӱлажым жаплат да ончыкылык тукымлан арален кодаш тыршат. Тыге шочмо-кушмо вер-шӧрнан ямже дене пырля чонышкем да усталык пашашкем, вургем брендышкемат этнический тема келгынак шыҥен шинчын. Но тудым утларак вияҥден колташ эше ятыр тыршаш кӱлеш.

- Коллекцийыштыда Киров кундемысе марий-влакын гына огыл, эрвелмарий тувырын ойыртемжат коеш. Мыланем гын эн чотшо лудынеран да изурвалтан оҥсакышда-влак келшат. Тушко мемнан вел изурвалте тыглай гына логалын огыл дыр?

- Моло икшыве-влакын кеҥеж канышлан «ковашт деке ялыш» кайымышт годым мый Нефтекамск олаште илыше ковам дек унала коштынам (Юлиян аваже, Виктория Мамеева (ӱдыр фамилийже Ирдуганова) - Илиш район Анач ялын шочшыжо, варажым ешышт Нефтекамскыш куснен толын. - авт.) да эрвелмарий-влакын йӱлашт, вургемышт могай улмымат эскеренам, ушеш пыштенам. Да, чынак, эрвелмарий вургем ойыртем творчествыштем шке кышажым коден. Тусо гай «корак шинча» - ме тудым тыге манына - кажне гаяк коллекцийыштем уло.      

Тувыр-влак дене пырля оҥсакышемымат тений февраль тӱҥалтыште Москвасе ВДНХ-ште «Россий» тӱнямбал форум-выставкыште Марий Элын стендыштыже ончыкташ пиал шыргыжале. Тудо шуко еҥлан келшен, очыни, кызыт урген пуаш йодшо-влак ятырын улыт.

- Чаманаш гына кодеш, эрвелмарий вургем негызеш моторын стилизоватлыме тувыр-влакым темлыше дизайнерна уке. Пайремлаште да концертлаште шулдакашан йылгыжалтше куэм гыч ургымо, эреак ик сынан тувырым чийыме, кыдалеш шийым сакалыме (Ожнысо фотолаште нигуштат тыгайым огына уж.) чылаж годым огыт куандаре да вургемнан акшымат волтат…    

- Сценыште мураш-кушташ да тыглай чиен кошташ ургымо вургем ойыртемалтшаш улыт. Мый гын шке брендем дене кажне кечын чиен коштмо вургемыш изин-изин марий, татар, башкир костюм-влакын элементыштым шыҥдарынем. Нуно мыйын ешемын эртыме илыш-корныж денат кылдалтыныт, садлан мый шкенан йӱлана-влакым арален кодышаш улам манын шонем.

- Мутланымашнам иктешлен, лудшо-влаклан мом тыланеда?

- Йӧратыме кидпашадам ыштылаш жапым да йӧным муза, чолгарак лийза, йырым-йырысе илышышкына сӧраллыкым ешарен шогыза - тидлан мотор вургемнат полшен кертеш. Ургаш але иктаж вес сомыллан тунемыда гын, йокрокланаш жапда ок код, кӱсеныштыда шийвундат эре лиеш.