25 март - Тӱвыра пашаеҥын кечыже. «Ял калык - тӱҥ полышкалышем да эҥертышем»

1999 ийыште, школ паша гыч кайымеке, Людмила Вениаминовналан ялысе клуб вуйлатышын пашажым темленыт, тыге тудо культура аланыш логалын да кызытат туштак тырша. 2016 ийыште нуно «Рвезе кумыл» ансамбльым чумыреныт. Кызыт клубышто Л.В. Дмитриева шкетын пашам ышта, сандене ансамбльыш коштшо ӱдырамаш-влак Людмила Вениаминовнан тӱҥ полышкалышыже да эҥертышыже улыт. Кажне кастене нуно, клубеш чумырген, могай пашам да кузе ыштышаш нерген каҥашат. 

Верысе калык клубыш погыныжо манын, пайрем касым, мероприятий-влакым эртарат. Кызыт ялыште самырык ӱдыр-рвезе шагал. Туге гынат нунын денат кертме семын пашам ышташ тыршат. Тений, мутлан, школышто икымше гыч индешымше класс марте улыжат латкум йоча тунемеш. Кеч-могай мероприятийын сценарийжым Людмила Вениаминовна шке воза, эртара. Пашаштыже эн тӱҥлан ял калыкын полышыжым шотла. Нунын деч посна мероприятийым, я пайремым эртараш ок лий. 

«Рвезе кумыл» ансамбль концерт дене тӱрлӧ районышто лийын, моло ял калык дене вашлийын, ойласен, койышыжым ужын. 2023 ий кеҥежым Уфаште Беларусь да Россий регион-влакын X форумышт годым калык-влакын келшымаш хороводышкышт ушнымышт да Йошкар-Олашке Пеледыш пайремыш мийымышт ансамбльын ӱдырамашыже-влаклан мондаш лийдыме шарнымашым коденыт. Тыгай мероприятийыште лияш - кугу чап, куат. 

Башкортостан Республикын тӱрлымӧ картше уло. Тудым ыштымашке Л.В. Дмитриева надырым пыштен - Янаул районын картшым тӱрлен. Тидын дене кузе от кугешне? Ансамбльлан вургемымат Людмила Вениаминовна шке тӱрлен урга. 

«Рвезе кумыл» ансамбльым да вуйлатышыже Л.В. Дмитриевам Культура пашаеҥын кечыж дене уло кумылын саламлена. Тек нунын чыла шонымашышт шукталтеш да творческий шӱлышышт моло еҥынат илышыжым волгыдыракым да порым ышта.