Этнофорумыш миеныт

Пошкырт кундемысе марий вургемым моло кундемыште илыше-влакын деч вигак ойырен палаш лиеш. Ий-влак эртыме семын тудо эркын вашталт толеш: ургызо-влак кызытсе жаплан келшыше материалым кучылтыт, вес семынрак шулыт да сӧрастарат. Шымленрак ончалаш гын, ожнысо ургызына-влак, тӱрлӧ тӱсан куэмым кучылтын, нуным тасма але пыске пӱй семын пӱчкеден, лудынерым луктынак, пеш мотор вургемым ыштеныт. Чыла тидым шотыш налын, Нуриман район Кугу Шеде ялысе «Эрвий» тӱрлем рӱдер (вуйлатышыже Людмила Сабанаевна Матюшина)  ты форум вашеш лӱмынак ожнысо гай ӱдырамаш тувыр-шовырым урген. Форум годым тыгак кажне кечын чийыме, ӱдыръеҥын, пайрем да теле вургемым йолчиемым, шийдарманым ончыктеныт.     

Марий калыкын йӱлажым, тӱвыражым арален да вияҥден кодымашке надырым пыштымыштым аклен, Марий Эл Республикын Тӱвыра, печать да калык-влакын пашашт шотышто министерствыже «Эрвий» тӱрлем рӱдерым таумут дене палемден.