«Шанель Тарля» эрвел кундемыш вашка

Тудын геройжо Инвалид-влак ушем пелен илыше 65-90 ияш ӱдырамаш-влак улыт. Шке жапыштым пайдалын да веселан эртараш манын, ковай-влак ансамбльым чумыреныт. Жап эртен, теве нуно коллективыштын 10 ияш лӱмгечыжым палемдаш ямдылалтыт. 

Пайремлан чыла ямде.  Нуно шке вуйлатышыштым, самырык баянистым вучат. Теве тудо толеш. Но… шкетын огыл. Пеленже самырык ӱдырамашым конден. Тудо солистке лиеш, а те тудлан полшаш тӱҥалыда, умылтара вуйлатыше. Тыгай темлымаш дене кува-влак келшат, шонеда? Кунам туге огыл. Нунын кокла гыч иктыжат шке вержым ала-могай тарлялан ынеж пу.

Теве тыгай оҥай историй дене кылдалтше пашам М. Шкетан лӱмеш театрын артистше-влак калыклан ончаш темлат. Марий кундемысе районлаште, яллаште тудым моткоч сайын вашлийыт. 

Ты постановкым Пошкырт кундемыште илыше родына-влакат ужшаш улыт манме шонымаш дене артист-влак декабрь тӱҥалтыште гастрольыш тарванат.  «Шанель Тарлям» 1 декабрьыште Калтасаште, 2 - Нефтекамскыште, 3 - Мишканыште, 4 -  Бирскыште, 5 декабрьыште Уфаште М. Карим лӱмеш национальный молодежный театрын сценыштыже модаш тӱҥалыт. Тендам Россий Федерацийын калык артистше Маргарита Медикова, Марий Элын калык артистше-влак Сергей Данилов ден Антонина Антонова, Марий Элын сулло артистше Марина Почтенева, артист-влак Галина Иванова, Ирина Кубекова, Светлана Филиппова дене вашлиймаш вуча. Мотор марий вургемышт, муралтен-кушталтен колтымышт, весела мыскарашт дене нуно ончаш мийыше-влакын кумылыштым нӧлталын кертыт манын чыла ӱшан уло.