Шочмо йылмет уло - элет уло. Вет чылажымат: моторым, ныжылгым, сӧралым, торжам, осалым - шкенан ава шӧр дене шыҥыше шочмо йылме дене умылаш тӱҥалына. Моктена, тӧрза воктеке ладыргалын, сылне мурым муралтыше куэм, олыкысо вис-вис, тегытвуй пеледыш-влакым, куанена изи мӱкш ден ошымшӱлышын ызгалын эртымыштлан.
Ага тылзе мучаште Елтек школыштына тыгай темылан «Шочмо йылме - тиде шочмо эл» оҥай конференцийым эртарышт. Йоча-влак шочмо вер-шӧрыштым шымленыт, кундемыштым моктымо сӱретым сӱретленыт, почеламут ден изи ойлымашлам возеныт. Визымше классыште тунемше-влак походыш мийымышт нерген каласкаленыт.
Кумшо-нылымше класслаште тунемше-влак «Шочмо вер» муро дене куандарышт. Нылымше класс гыч Артемий Исаков ден Дмитрий Самлеев Елтек ял нерген туге сӧралын каласкалышт, колыштын шерет ок тем. Василий Муратов ден Элина Губаева почеламутым сылнын лудмышт дене ойыртемалтыч.
Чыла шот денат эн кугу усталыкым кугурак классыште тунемше-влак ончыктеныт. Шымше ден кандашымше классыште тунемше-влак шке шочмо ялышт нерген шымлымаш пашам намиеныт гын, индешымше классыште тунемше-влак шочмо йылме нерген шонкалымашан сочиненийым возеныт. Чыла тиде паша Елтек яллан 300 ий темме лӱмеш эртаралтын.
Ялнан да калыкнан мастарлыкше нерген шочмо йылмына дене каласкаленна, шкенан моштымынам почын пуэнна. Тышечын иктым гына умылаш лиеш: йылмынан ныжылге да кӱдыратле, тыматле да муро семын йоҥгалтше вийже, усталык памашна шочмо элнан куатшым ешараш полшат.