Ойлышаш шомакем уло. Йотлан - «шӱм», шкенанлан - кӱ?

Мутлан, кунам ме телефоныш шкенам шке возена, «Селфим ыштена» манына да, тӱшка кылыш вераҥден, «лайкым» шындаш йодына. А молан ме тудым «шӱм» огына ман? Тӱшка кыл дене пайдаланыше шуко еҥ «лайфхакым» пуаш йӧрата. Тиде шомакымат «пайдале каҥаш» манаш лиеш. Шке сатуштым лукшо да ужалыше-влак тудлан «логотипым» ыштат. Тидым мемнан кугезына-влак ожно «тамга» маныныт. Кочамын товар, кольмо, шорвондо да моло ӱзгареш тамгам пыштымыжым кызытат шарнем.

Информационный обществыште «фейк» шукемеш. Цивилизацийын кызытсе кӱкшытыш шумыжо тидым ышташ чыла йӧным пуа. «Шоя» мутым «фейк» алмаштен. 

Тиддеч посна тӱшка кыл-влакын «темлымышт» дене мемнан йочана-влак йот элыште лукмо модыш-влак дене модыт. Спиннер - тыртыш, Хагги-Вагги - ия але шӱкшондал… Тыгодым йолташыштым «Айда модына» огыл, а «Гӧу модаш» ышталыт. Теве мемнан патриотизм шӱлышеш кушташ тыршыме тукымна! Ни воштылаш, ни шорташ… Тыгай илышыш мемнам Интернетын «поянлыкше» шуктен. Тудым йӧрташ чепым кӱрлмӧ сита. Но тунам уло паша шогалеш. Электротулым йӧртыде, уш-акыл дене шонен, тудым тӧрлаш лийже ыле…