Кӱшыч кече шыргыжеш гынат, мардеж юалгын пуал колта. Но тидыже олыкышто пайрем шӱлышлан озаланаш чаракым ыштен огыл. Сценыште алын-гӱлын койын куштышо-влак тӱрлӧ ийготан лийыныт. Фестивальым ончаш толшо калыкын кумылжым тиде эше чотрак нӧлтен да кажне куштымо номерлан калык рӱжге совым кырен.
3 степенян диплом дене «Оҥгыр йӱк» (Благовещенск ола), «Пеледыш аршаш» (Ленинский культура пӧрт), «Ош пеледыш» (Балтач район) ансамбль-влакым палемденыт. Кокымшо верым «Шонанпыл» (Тынбай), «Ош пеледыш» (Кугу Соказа) коллектив-влаклан пуэныт. Икымше верыш «Юго» (Пӱнчер), «Марий кас» (Бирск ола) ансамбль-влакын куштызышт лектыныт. Гран-прим Тынбай гыч «Рвезылык» ансамбль сулен налын. Кажне ийын тыгай пайрем-влакын лектышышт кӱкшырак лийже манын, жюрин еҥже В.С. Сагадеев куштышо-влаклан икмыняр мастер-классым ончыктен.