Шокталтат гын, кушталтат

Южгунам «Кажне ийын ик семын эртарыме пайрем деч калыкын шержат темеш дыр» манын шоналтет гынат, тушко погынышо-влакын весела кумылыштым ужын, шонымаш йӧршын вашталтеш. 

Калыклан келша гын, мияшат йӧным муэш. Тиде ганат зал тич еҥ погынен ыле. Сценыште шоктышо да мурышо-влак дене пырля ончаш мийыше-влакат, такмаклен-такмаклен, «Кандырам» пунышт, родо-шочшышт да палымышт дене вашлийыч, кутырышт. Ушыштышт мыняр такмакым кучат гын? Кунам эше икганаште куд музиканчын да ныл тӱмырзын семышт почеш кушташ йӧн лиеш?!

Кӧ миен кертын огыл гын, музиканче ден тӱмырзӧ-влакын койышыштым, мастарлыкыштым «Чолманын» интернетысе «Вконтакте» (vk.com/cholman) лаштыкыштыже ончал кертыда - тушан ятыр музиканчын шоктымыжым, еҥ-влакын залыште ракатланен куштымыштымат вераҥденна.