Палыме лийына. Сылнымут тӱняшкыже унала пурен лекса

Пӱртӱс помыжалтеш! Кайык-влак кокла гыч эн ончыч киса-влак шошылан куанымыштым шижтарат. Окна воктек шинчын, помыжалтше копшаҥге-влакым чӱҥгышыла, нерышт дене яндам перкалат, пуйто мыланна «Пӧртыштӧ ида шинче, уремыш лекса, шошо толын!» маннешт. Шокшо эл гыч шырчык-влакат пӧртылыныт, пушеҥгыш шинчын, кажне еҥым сылне мурышт дене куандарат. Тыгай годым «Шошо толын, шошо!» почеламут корно ушыш толеш. Арамлан огыл дыр Поэзий кечымат лач пӱртӱс ылыжме пагытыште палемдат. Йӱштӧ  теле деч вара ылыжаш тӱҥалше пӱртӱсым йывыртен ончен, кажне еҥын чоныштыжо сылнымут корно шочеш дыр…

Мый лудшо-влакым мемнан кундемыште кушшо да тунемше поэт дене палымым ыштынем. Кодший кеҥежым тудо мемнан деке унала пурен ыле. Ӱстел коклаште чайым йӱын шинчышыла, илыш-корныжо да усталык пашаж нерген каласкалыш. Кызыт тудо Марий Элысе Килемар поселкышто ила. Кеҥежым шочмо Монар ялышкыже каналташ да чонлан лишыл кундемжым ончал савырнаш толеш. 

В.Б. Пахмутова 1964 ий 18 октябрьыште Хакасский областьысе Абакан олаште илыше шуко икшыван ешеш шочын. 1969 ийыште ешышт ачажын шочмо ялышкыже, Монарыш, илаш куснен. Ӱдыр Монар кандашияш, вара Нерге кыдалаш школлаште тунемын. 1981-ше ийыште  Йошкар-Оласе Марий кугыжаныш пединститутыш тунемаш пурен. Марий да руш йылмыла ден литературым туныктышо специальностьым налмек, ӱмыржӧ мучко икшыве-влаклан шинчымашым пуэн. Кызыт сулен налме канышыште улеш гынат, школышто библиотекарьлан ышта. 

Вера Биктубаевна почеламутым школышто тунеммыж годымак возаш тӱҥалын. Нуным «Пионерская правда» газетешат савыктеныт. 2005-ше ийыште «Туманная даль» икымше почеламут аршашыже, 2006-шо ийыште «Дарю», 2012-шо ийыште «Уроки жизни» сборникше-влак ош тӱням ужыныт. Кум почеламутшылан семым возымо. Тиде муро-влакым Светлана Луничкина мура.

В. Пахмутова 2012 ийыште марий йылмым туныктышо-влакын район конкурсыштышт сеҥен да республикысе конкурсышто мастарлыкым ончыктен. Тыгак тӱрлӧ интернет-конкурслаште вийым тергаш жапым муын…

Вера Биктубаевнан творчествыштыже пӱртӱсым, шочмо суртым, кундемым йӧратымым шижына. Тудо «Кӧ пӱртӱсын моторлыкшым ужын мошта, тудо чонжо дене поян лиеш» тӱҥ ойым шыҥдара да шочмо мландым йӧраташ, моторландараш, вияҥдаш уло вийым пышташ, чыла пашаштат поро айдеме лийын кодаш ӱжеш. Почеламутшо-влакым лудаш да умылаш куштылго, нуно сылнын йоҥгат. 

Поэтын почеламут корнылаже эр-эрдене кудывечыш лекмыж годым, кечывалым кочкышым ямдылыме але кастене каваште яндар шӱдыр йолгыжмо годым шочыт. Нуно ял илыш гаяк проста улыт. Вера Биктубаевнан творчествыштыже тӱҥжӧ - айдемым йӧратымаш, порылыкым тыланымаш, айдемым сылнештараш да пиаланрак ышташ шонымаш. Сылнымутыштыжо кечым, мланде пеледмым моктымаш шуко…

Сай, кунам кажне кечын мемнан илышнам шке творчествышт дене пойдарыше, сӧрастарыше поэт-влак улыт… Тидын нерген шуко возаш лиеш. Паша деч вара каналташ шичмыда годым нине почеламут аршаш-влакым шке кидышкыда налын, Вера Пахмутован  сылнымут тӱняшкыже унала пурен лектыда гын, эшеат сайрак лиеш…

В.Б. Пахмутован (Николаеван) творчествыжлан лӱмдымӧ поэтический кас клубышто эртыш. Ончаш толшо-влак сылнымут тӱня нерген шуко уым пален нальыч. Касым вӱдышӧ-влак поэтын илыш-корныжо, почеламут сборникше дене палдарышт. Йоча-влак шкаланышт келшыше почеламут-влакым лудыч. Вара чылан В. Пахмутован почеламутшылан возымо мурым колыштна. Поэзий кас пайдалын да оҥайын эртыш…