«Марий мланде» - Шаран кундемыште

Самодеятельный артист-влак кум кече жапыште Октябрьский олаште, Шаран районын Мешер, Тумбагуш, Чикей, Янахмат яллаштыже да Шаран селаште калыкым сылне марий концерт дене куандарышт. Тау артист-влаклан, мемнам огыт мондо, а иленаже ме, Бирск, Калтаса, Мишкан район-влак дене таҥастарымаште, ӧрдыжтырак, тораштырак, садлан куштышо да мурышо марий коллектив-влак шуэнрак толедат.

Концерт программе пеш сай, оригинальный ыле: йӧратымаш да илыш нерген, мыскара да калык муро-влакат йоҥгалтыч. «Марий мланде» ансамбльын репертуарыштыже Морко, Шернур, Торъял, Медведево, Марий-Турек, Советский, Оршанке вел веле огыл, Урал, Пошкырт, Татарстан, Киров вел мурен куштымаш-влакат улыт. Оҥай мыскара сценке-шамычат куандарышт. Коллективыш утларакше кокла ийготан-влак коштыт.

Кок шагат шуйнышо концерт ик шӱлыш дене шижде эртен кайыш. Калык чоным куандарен, кумылым нӧлталын кертычак! Да калык шкежат тиде концертым пеш вучен. А вет южгунам огытат погыно. Ончаш толшо-влак кажне номерым кидым рӱж совен вашлийыч. 

Концертым ансамбльын администраторжо Анатолий Николаев устан вӱдыш, илыш гыч лекше мыскараже-влакым колыштын, шер теммеш воштылна, пешак весела лие. Ансамбльын вуйлатышыже Анатолий Козырев концерт мучко гармоньым ямлын шоктыш. «Марий мландын» мастарлыкше пеш кӱкшӧ, кугешнена!

Л.М. Шамыкаева, сценыш лектын, Шаран район марий-влак лӱм дене артист-влаклан тауштен ойлыш да районысо тӱвыра пӧлкан таумутан серышыжым кучыктыш.

Октябрьский олаште Р.А. Султангареева, Шараныште марий предприниматель-влак Н.М. Давлетова да В.Б. Миндияров мӱндыр уна-влакым вашлиймаште шуко полшеныт. Кугу тау! «Марий мланде» ансамбльлан эше шуко-шуко жап шке мастарлыкше дене марий калыкым куандарен шогаш тыланена!