21 март - Поэзийын тӱнямбал кечыже

Юзо ялем

Ужар ломберан кундемемым

Ужальым адак омешем.

Кидетым шуен мыланем тый,

Ӱжат, тол, манат, кӱдыкем.

Тоштде тошкалам шочмо мландым,

Саскан сад-пакчашке пурем.

А тиде садерже - чон каныш - 

Ала лач узьмакыш урем?

Йырваш чыла ошо да чинче,

Ший лум йогалеш ӱмбакем.

Изи лывыла толын шинче 

Орлай гыч сäскä копашкем.

Уке! Ты пырчат поран огыл!

Тыге ош ломбер пеледеш!

Мардеж пуалеш гын, эсогыл

Ялемым мӱй пуш леведеш.

Ший-ошо - марийын тӱҥ тӱсшӧ,

Ожнак тыге юмо пӱрен.

Толаш тиде юзо пӱртӱсыш

Мылам кеч-кунам - чон пайрем.

А. ЮЗУКБАЕВА. Чорай села, Мишкан район.

Лийылдем ыле…

Лийылдем ыле писе мардеж

Тый декет вашкеракын шуаш.

Йырым-йыр чоҥешталын эртен,

Чуриетым шыман шупшалаш.

Ой, уке, кеҥеж йӱр лийылдем,

Тугай ныжылге, леве вӱдан.

Шӱлыкетым колтем чывылтен,

Кумылет огеш лий пич йӱд гай.

Я лиям мый изи кайыкет,

Весела да йомартле йолташ.

Толын шинчын сад вел окнашкет,

Сылне мурым эр-кас муралташ.

А лияш гын лум пырче мылам - 

Кидышкет пӧрдын-модын волаш,

Чон шокшетым шижаш курымлан

Да ласкан кидкопашет шулаш?

А. ЮЗУКБАЕВА. Чорай села, Мишкан район.

Мый сарым ужын омыл

Кеч шинчам ден сарым ужын омыл.

Тудын лӱмжым пелешташ лӱдам.

Вет ужам чонем ден шучко тулжым,

Да ойгеш варналтше калыкнам.

Мыняр салтакым ужатен элемже,

Илышнам тушман деч аралаш.

Сеҥымаш верч мландыш шукын возыч,

Тыгайым ок лий нигунам мондаш.

Адакат тушман нӧлтале вуйжым,

Опкынлан ок сите мландыжат.

Ок йӧрате тудо Юмын улмым,

Чонышто ия кашак илат.

Но кунам осаллык сеҥен ПОРЫМ?!

Вет тӱнян пунчалжылан кӧра

Уло чон ден жаплена Ош Юмым,

Лач пырля ме йӧсым сеҥена.

С. САЛИЕВА. Мишкан села

Тӱняште уло чылажат

Уло гын тӱняште поро вий,

Кудыжлан ӱшаныме шуэш,

Шкеже тудым шарыше тый лий -

Пӱрышӧ ок кондо шулдыреш…

Уло гын тӱняште келшымаш,

Моштена аклен да переген?

Илышет лиеш гынат шыма,

Трук кертеш янда гай пудырген.

Уло гын… эше йӧратымаш -

Курымешлан мо? Сита жаплан?

Ужмышудымашын вашталташ

Икте-весылан могай  лийман?

Уло гын… А мо кӱлеш, кунар?

Порылыкын уло ӱмылжат.

Вӱдшор - румбыкан, памаш - яндар,

Уло ты тӱняште чылажат…

И. ГУБАЕВ.

Икте веле шочмо вер

Уло мыйын,  тыйынат,

Икте кажне еҥынат

Эн сӧрал да эн чевер, 

Чонлан шерге шочмо вер.

Кӧн мотор  олма садер 

Да пундашдыме памаш, 

Кумда йогынан эҥер,

Я мучашдыме ошма.

У, мотор, поян ола 

Южын чоным ылыжта,

Луман курык,  ий ора

Весылан пешак келша.

Йошкар маке - шошын  тӱс -

Шӱмым шокшын шымата,

Лойгыкталше кожын лӱс

Унала мияш кӱшта.

Йыр шарлен кумда пасу -

Шурным  кушто куанен.

Теҥыз вӱд чонлан асу,

Кучо колым, йывыртен.

Тӱрлӧ мланде, тӱрлӧ эл 

Тӱрлӧ вере верланен,

Шочын-кушшо тусо еҥ

Тукымвож ден тӱвырген.

Авамландым переген,

Иле тые ик ой ден.

Шого талын тудын верч -

Икте веле вер-шӧрет.

А. ВАСИНКИНА. Рабак ял, Янаул район. 

Теле мучаш

Ойырлаш ок шоно теле,

Ынеж пу сапым весылан,

Ала тылзе, тылзат пеле -

Изишак жап кӱлеш тудлан.

Кисавуй лумжым овартен, 

Тырша у кӱртым уэмдаш,

Кандалге тӱсым ешарен,

Ӱмбакше шийым варалта.

Ош пургыж имньыжым кычкен,

Петыркала чара верлам,

Адак, изиш канаш шонен,

Лум пыл йымалне нералта.

Тарватен  мардежым, талым,

Март шольыж деке чоҥешта.

Модын-воштыл, шарт тошкалын, 

Тудлан черет тоям шуя.

А. ВАСИНКИНА. Рабак ял, Янаул район.